کانپور، 16 جولائی (ہ س)۔

اترپردیش کے کانپور میں مہاراج پور تھانہ علاقے کے ہاتھی گاوں میں کھیت کی رکھوالی کر رہے ایک کسان کا دھاردار ہتھیار سے قتل کر دیا گیا۔ جمعرات کے روز ٹیوب ویل کے پاس اس کی خون آلود لاش ملنے سے علاقے میں سنسنی پھیل گئی۔ جائے وقوعہ سے شراب کی خالی بوتلیں اور کئی گلاس ملنے کے بعد پولیس کو خدشہ ہے کہ واردات سے پہلے وہاں کچھ لوگوں نے شراب پارٹی کی تھی۔ پولیس نے معاملے کی جانچ شروع کر دی ہے۔

مقتول کی شناخت ہری موہن سنگھ یادو (45) ساکن ہاتھی گاوں کے طور پر ہوئی ہے۔ وہ کھیتی باڑی کے ساتھ ساتھ ایک کھیت کی دیکھ بھال بھی کرتے تھے اور روزانہ رات میں ٹیوب ویل پر ہی رات گزارتے تھے۔ اہل خانہ کے مطابق بدھ کی رات انہوں نے گھر پر کھانا نہیں کھایا تھا۔ رات تقریباً 10 بجے جب اہل خانہ نے فون کر کے کھانے کے لیے بلایا تو انہوں نے بتایا کہ وہ کھانا کھا چکے ہیں اور ٹیوب ویل پر ہی رکیں گے۔

جمعرات کی صبح کھیت پر کام کرنے پہنچے گاوں والوں نے ٹیوب ویل کے پاس خون سے لت پت لاش دیکھی اور اس کی اطلاع پولیس و اہل خانہ کو دی۔ موقع پر پہنچی پولیس نے دیکھا کہ مقتول کے گلے اور ہاتھ پر دھاردار ہتھیار کے گہرے زخم تھے۔ آس پاس شراب کی بوتلیں اور کئی خالی گلاس بھی پڑے ملے۔

لاش کو پوسٹ مارٹم کے لیے بھیجے جانے کے دوران اہل خانہ نے کچھ دیر مخالفت کی۔ ان کا الزام تھا کہ فورینسک جانچ پوری ہونے سے پہلے ہی پولیس لاش ہٹانے کی کوشش کر رہی تھی۔ بعد میں سمجھانے پر اہل خانہ پرسکون ہوئے، جس کے بعد فورینسک ٹیم نے جائے وقوعہ سے شواہد اکٹھے کیے۔

اہل خانہ نے گاوں کے ہی رہنے والے ملائم سنگھ یادو، شیام اور ارجن گپتا پر قتل کا الزام لگایا ہے۔ ان کا کہنا ہے کہ تینوں اکثر ٹیوب ویل پر آ کر شراب پارٹی کرتے تھے۔ پولیس نے الزامات کی بنیاد پر تینوں سے پوچھ گچھ شروع کر دی ہے۔

ڈی ایس پی مشرقی ستیہ جیت گپتا نے بتایا کہ اہل خانہ کی طرف سے لگائے گئے الزامات اور جائے وقوعہ سے ملے شواہد کی بنیاد پر تمام پہلووں کی گہرائی سے جانچ کی جا رہی ہے۔ قتل کے پیچھے کی وجہ ابھی واضح نہیں ہو سکی ہے۔ جانچ میں سامنے آنے والے حقائق کی بنیاد پر آگے کی کارروائی کی جائے گی اور جلد ہی پورے معاملے کا انکشاف کیا جائے گا۔

ہندوستھان سماچار

---------------

ہندوستان سماچار / انظر حسن