نئی دہلی، 16 جولائی (ہ س)۔ دہلی ہائی کورٹ بار ایسوسی ایشن نے جمعرات کو ضلعی عدالتوں کے مالیاتی دائرۂ اختیار میں اضافے کے ہائی کورٹ انتظامیہ کے فیصلے کے خلاف گزشتہ تین دنوں سے جاری ہڑتال ختم کر دی ہے۔ ہائی کورٹ بار ایسوسی ایشن نے فیصلہ کیا ہے کہ وہ جمعہ یعنی 17 جولائی سے عدالتی امور میں حصہ لے گی۔

دہلی ہائی کورٹ بار ایسوسی ایشن نے ہڑتال واپس لینے کا فیصلہ مرکزی وزیر قانون ارجن رام میگھوال اور ہائی کورٹ کے چیف جسٹس ڈی کے اپادھیائے کے ساتھ ہوئی ملاقات میں ملنے والی یقین دہانیوں کے بعد کیا۔ بار ایسوسی ایشن نے کہا ہے کہ چیف جسٹس نے انہیں اپنی عرضداشت پیش کرنے کے لیے کہا ہے۔

ہائی کورٹ کے وکلا ضلع عدالتوں کے مالیاتی دائرۂ اختیار میں اضافے کے ہائی کورٹ انتظامیہ کے فیصلے کے خلاف 14 جولائی سے عدالتی کاموں کا بائیکاٹ کر رہے تھے۔

ہائی کورٹ انتظامیہ نے دہلی کی ضلعی عدالتوں کا مالیاتی دائرۂ اختیار دو کروڑ روپے سے بڑھا کر دس کروڑ روپے کر دیا ہے۔ بار ایسوسی ایشن اسی فیصلے کی مخالفت کر رہی ہے۔ ہائی کورٹ بار ایسوسی ایشن کا کہنا ہے کہ اس فیصلے سے ہائی کورٹ کے وکلا پر کافی اثر پڑے گا اور ان کے پاس آنے والے مقدمات میں 70 فیصد تک کمی ہو سکتی ہے۔

اس سے قبل دہلی کی تمام ضلعی عدالتوں کے وکلا نے بھی اسی معاملے کو لے کر 14 مئی کو عدالتی کاموں کا بائیکاٹ کیا تھا۔ ضلعی عدالتوں میں عدالتی کاموں کے بائیکاٹ کی اپیل آل ڈسٹرکٹ کورٹس بار ایسوسی ایشنز آف دہلی کی کوآرڈینیشن کمیٹی نے کی تھی۔

کوآرڈینیشن کمیٹی نے دہلی کی ضلعی عدالتوں کے مالیاتی دائرۂ اختیار کو دو کروڑ روپے سے بڑھا کر بیس کروڑ روپے کرنے کا مطالبہ کیا تھا۔ اس مطالبے پر کمیٹی کی ہائی کورٹ انتظامیہ کے ساتھ بات چیت بھی ہوئی تھی، جس کے بعد 14 مئی کے بعد عدالتی کاموں کے مزید بائیکاٹ کا فیصلہ واپس لے لیا گیا تھا۔

اب اس معاملے پر وکلا کی دونوں تنظیمیں آمنے سامنے ہیں۔

ہندوستھان سماچار

---------------

ہندوستان سماچار / عبدالواحد