تہران، 15 جولائی (ہ س)۔ ایران کی اسلامی انقلابی گارڈز کور (آئی آر جی سی) نے دعویٰ کیا ہے کہ اس نے کویت، بحرین اور اردن میں امریکی فوجی اڈوں پر جوابی حملوں کا ایک نیا سلسلہ شروع کیا ہے۔ آئی آر جی سی کے مطابق یہ حملے اس کے ’ آپریشن نصر 2‘ کے چوتھے، پانچویں اور چھٹے مرحلے کا حصہ ہیں اور یہ ایرانی سرزمین پر مبینہ امریکی حملوں کے جواب میں کیے گئے۔

آئی آر جی سی نے الگ الگ بیانات میں کہا کہ آپریشن کے چوتھے مرحلے میں مینا عبداللہ، کویت میں واقع امریکی لاجسٹک اینڈ سپورٹ سینٹر’کے جی این‘ کو نشانہ بنایا گیا، جس سے وہاں بھاری نقصان پہنچا۔

پانچویں مرحلے میں آئی آر جی سی نے بحرین میں امریکی پانچویں بیڑے کے کمانڈ اینڈ کنٹرول سینٹر، فوجی سازوسامان کے گودام اور ایندھن کے ڈیپو پر حملہ کرنے کا دعویٰ کیا۔ تنظیم نے کہا کہ ان سہولیات کو بھی شدید نقصان پہنچا ہے۔

چھٹے مرحلے میں آئی آر جی سی کا دعویٰ ہے کہ جارڈن کے الازراق میں واقع امریکی فوجی اڈے پر اس کی ایرو اسپیس فورس نے حملہ کیا۔ بیان میں دعویٰ کیا گیا کہ امریکی ایفõ 15، ایفõ 16، اورایفõ 35 جنگی طیاروں کی پناہ گاہوں کے ساتھ ساتھ کئی ایم کیوõ 9 ڈرونز کو بھی نشانہ بنایا گیا اور انہیں تباہ کر دیا گیا۔

پاسداران انقلاب نے امریکہ پر ایران کے جنوبی ساحلی علاقوں پر کروز میزائلوں اور فضائی بموں سے حملہ کرنے کا الزام لگایا۔ گروپ نے کہا کہ اس کی جوابی فوجی کارروائی اس وقت تک جاری رہے گی جب تک امریکہ اپنی جارحانہ سرگرمیاں بند نہیں کرتا۔پاسداران انقلاب نے یہ بھی دوہرایا کہ آبنائے ہرمز بند رہے گا اور خبردار کیا ہے کہ اگر خطے میں کشیدگی جاری رہی تو تیل اور گیس کی برآمد کے دیگر راستے متاثر ہو سکتے ہیں۔

ایران کا الزام ہے کہ امریکہ نے 7 اپریل سے لے کر اب تک متعدد بار ایرانی حدود کی خلاف ورزی کی ہے، جس دن امریکی صدر ڈونلڈ ٹرمپ نے ایران کو نشانہ بناتے ہوئے امریکی اسرائیلی جارحیت کے تازہ ترین دور میں یکطرفہ جنگ بندی کا اعلان کیا تھا۔یہ خلاف ورزیاں اس وقت بھی جاری رہیں جب واشنگٹن اور تہران نے گزشتہ ماہ پاکستان کی ثالثی میں ایک مفاہمت کی یادداشت پر دستخط کیے تھے، جس کی پہلی شرط واضح طور پر تمام محاذوں پر جارحیت کو روکنا ہے۔

ہندوستھان سماچار

ہندوستان سماچار / Mohammad Khan