بینکاک، 13 جولائی (ہ س)۔ تھائی لینڈ کے دارالحکومت بینکاک کے چاتوچک علاقے میں واقع ایک پر ہجوم پب میں اتوار کی دیر رات آگ لگنے سے کم از کم 27 افراد جاں بحق ہو گئے، جبکہ 63 افراد زخمی ہوئے۔ زخمیوں میں 22 کی حالت تشویش ناک بتائی جا رہی ہے۔ زیادہ تر افراد کی موت آگ کے شعلوں سے نہیں بلکہ دھویں کے باعث دم گھٹنے سے ہوئی۔
ترکیہ کی سرکاری خبر رساں خدمت انادولو اور فرانس کے نشریاتی ادارے فرانس 24 کے مطابق تھائی وزیرِ اعظم انوتن چرنویراکول نے جائے حادثہ کا دورہ کرنے کے بعد بتایا کہ ابتدائی جانچ میں یہ بات سامنے آئی ہے کہ اسٹیج کے قریب نصب برقی حفاظتی آلے سے پہلے دھواں اٹھا، اس کے بعد بجلی منقطع ہو گئی اور پھر زور دار دھماکا ہوا۔ بھگدڑ کے دوران کئی افراد پچھلی جانب موجود بیت الخلا کی طرف بھاگے، جہاں باہر نکلنے کا کوئی راستہ موجود نہیں تھا۔
بینکاک کے گورنر چاڈچارٹ سٹّیپُنٹ نے بتایا کہ آگ نہایت تیزی سے چھت تک پھیل گئی۔ کئی لاشیں ہنگامی اخراج کے راستے کے قریب سے ملی ہیں، جس سے شبہ ظاہر کیا جا رہا ہے کہ اخراج کا راستہ کسی رکاوٹ کی وجہ سے بند تھا۔
بینکاک شہری انتظامیہ کے ڈیزاسٹر مینیجمنٹ محکمہ کے ڈائریکٹر سورییاچائی راویوان نے بتایا کہ آگ بجھانے والے عملے کو اندر داخل ہوتے وقت راستے میں میزیں اور کرسیاں رکھی ہوئی ملیں، جس کی وجہ سے امدادی اور بچاؤ کی کارروائی متاثر ہوئی۔
عینی شاہد ین نے بتایا کہ انہوں نے اسٹیج کے قریب دھواں اٹھتے دیکھا، جس کے چند ہی لمحوں بعد پورے مے خانے میں بھگدڑ مچ گئی۔ انہوں نے ایک خاتون کو باہر نکالنے میں مدد کی، لیکن وہ صرف ایک ہی شخص کو بچا سکے۔
آگ بجھانے والے عملے نے تقریباً دو گھنٹے کی مسلسل کوشش کے بعد آگ پر قابو پا لیا۔ فی الحال آگ لگنے کی وجوہات کی تفصیلی جانچ جاری ہے۔
تھائی لینڈ میں مے خانوں اور شبینہ تفریح گاہوں میں حفاظتی معیار کے حوالے سے پہلے بھی سوالات اٹھتے رہے ہیں۔ سال 2022 میں چون بوری صوبے کے ماؤنٹین بی شبینہ تفریح گاہ میں لگنے والی آگ سے 25 افراد جاں بحق ہوئے تھے، جبکہ 2009 میں بینکاک کے سانتیکا کلب میں نئے سال کی تقریب کے دوران لگنے والی آگ میں 67 افراد اپنی جانوں سے ہاتھ دھو بیٹھے تھے۔
حکام نے واقعے کی جانچ شروع کر دی ہے اور یہ معلوم کرنے کی کوشش کی جا رہی ہے کہ آگ کیسے لگی اور آیا حفاظتی ضابطوں پر عمل درآمد میں کسی قسم کی غفلت برتی گئی تھی۔
ہندوستھان سماچار
--------
ہندوستان سماچار / عبدالواحد
