بیجنگ، 12 جولائی (ہ س)۔

چین کے مشرقی ساحل سے ٹکرانے والے سمندری طوفان 'باوی' نے بڑے پیمانے پر تباہی مچا دی ہے۔ تیز ہواو¿ں اور موسلا دھار بارش کے باعث ملک بھر میں ہزاروں پروازیں منسوخ یا تاخیر کا شکار ہو گئی ہیں جبکہ کئی علاقوں میں تیز رفتار ریل خدمات بھی متاثر ہوئی ہیں۔ صورتحال کے پیش نظر چینی حکام نے بڑے پیمانے پر ہنگامی انتظامات کیے ہیں۔

چین کے سرکاری میڈیا ژنہوا اور دیگر میڈیا رپورٹس کے مطابق سمندری طوفان 'باوی' نے ہفتے کے روز مشرقی چین کے صوبے زی جیانگ میں لینڈ فال کیا، جس سے جنوبی اور مشرقی چین کے کئی حصوں میں شدید بارش ہوئی۔ ٹریول اینالیٹکس پلیٹ فارامیٹرپ نے اطلاع دی ہے کہ اتوار کو طے شدہ 2,800 سے زیادہ ملکی اور بین الاقوامی پروازیں منسوخ کر دی گئی ہیں۔

طوفان نے کئی بڑے شہروں کو متاثر کیا ہے جن میں شنگھائی، نانجنگ، ہانگزو، ووہان، شینیانگ، ڈالیان اور چینگڈو شامل ہیں۔ جنوب مشرقی فوجیان، ژی جیانگ، جنوبی گوانگسی اور ہینان کے ہوائی اڈوں پر بھی بڑی تعداد میں پروازیں منسوخ کر دی گئیں۔ خراب موسم کی وجہ سے بیجنگ کیپیٹل انٹرنیشنل ایئرپورٹ اور بیجنگ ڈیکسنگ انٹرنیشنل ایئرپورٹ پر بھی کئی پروازیں تاخیر کا شکار ہوئیں۔

مشرقی چین کے صوبہ جیانگ سو میں 45 ہوائی اڈوں بشمول شنگھائی، ہانگ زو اور چانگ زو نے ٹائفون الرٹ جاری کیا ہے۔ شنگھائی پڈونگ اور شنگھائی ہونگکیاو بین الاقوامی ہوائی اڈوں پر آپریشنل صلاحیت بھی متاثر ہوئی ہے، تقریباً 30 فیصد پروازیں منسوخ ہونے کی توقع ہے۔

ریل کی آمدورفت بھی متاثر ہوئی۔ احتیاط کے طور پر کئی علاقوں میں تیز رفتار ٹرینوں کو عارضی طور پر روک دیا گیا ہے۔

دریں اثنا، چین کے قومی موسمیاتی مرکز نے شدید بارش کے لیے ریڈ الرٹ اور سمندری طوفان کے لیے اورنج الرٹ جاری کیا ہے۔ محکمہ موسمیات کے مطابق، اگلے 24 گھنٹوں کے دوران ژی جیانگ، شمالی فوجیان، جنوبی انہوئی، شمال مشرقی جیانگ شی، بیجنگ اور ہیبی کے کئی حصوں میں موسلادھار سے انتہائی شدید بارش کا امکان ہے۔ کچھ علاقوں میں 250 سے 500 ملی میٹر تک بارش ہو سکتی ہے جبکہ تائیوان کے کچھ حصوں میں 800 ملی میٹر تک بارش ہو سکتی ہے۔

ٹائفون کے خطرے کے جواب میں، چین کی وزارت برائے ایمرجنسی مینجمنٹ نے شنگھائی، جیانگ سو، آنہوئی، جیانگسی اور سیچوان میں سیلاب اور ٹائفون پر قابو پانے کے لیے سطح 4 کا ہنگامی ردعمل نافذ کیا ہے۔ آبی وسائل کی وزارت نے ژی جیانگ اور فوجیان میں سیلاب کنٹرول ایمرجنسی کی سطح کو 3 لیول تک بڑھا دیا ہے۔ وزارت ٹرانسپورٹ نے شدید بارش کے جواب میں ایک اعلیٰ سطحی ہنگامی ردعمل بھی نافذ کیا ہے۔

حکام نے ساحلی علاقوں سے لوگوں کو نکال لیا ہے، بندرگاہوں میں ماہی گیری کی کشتیوں کو روک دیا ہے اور لوگوں کے امدادی کیمپوں میں رہنے کا انتظام کیا ہے۔ حکام نے عوام سے اپیل کی ہے کہ وہ غیر ضروری سفر سے گریز کریں اور موسم کی وارننگ پر عمل کریں۔

ہندوستھان سماچار

ہندوستان سماچار / عطاءاللہ