نئی دہلی، 11 جولائی (ہ س)۔ تقریباً 60 لاکھ روپے کے دھوکہ دہی کے معاملے میں گزشتہ ایک سال سے عدالت اور پولیس کی آنکھوں میں دھول جھونک رہا اشتہاری مفرور ملزم آخر کار آئی جی آئی ہوائی اڈے پر پہنچتے ہی دہلی پولیس کے ہاتھ چڑھ گیا۔ ملزم کافی عرصے سے اپنا مقام تبدیل کرکے گرفتاری سے بچ رہا تھا لیکن مقامی معلومات اور مینوئل نگرانی کی بنیاد پر آئی پی اسٹیٹ تھانہ پولیس نے اسے گرفتار کرلیا۔

وسطی ضلع کے ڈپٹی کمشنر آف پولیس روہت راجبیر سنگھ نے ہفتہ کو کہا کہ سنٹرل ڈسٹرکٹ پولیس اشتہاری بدمعاشوں کے خلاف خصوصی مہم چلا رہی ہے۔ اسی دوران آئی پی اسٹیٹ پولیس اسٹیشن کی ایک ٹیم کو اطلاع ملی کہ مکیش کمار (39) ڈومیسٹک ایئرپورٹ پر موجود ہے۔ اطلاع ملنے پر پولیس کی ٹیم جائے وقوعہ پر پہنچی اور علاقے کو گھیرے میں لے کر اسے گرفتار کر لیا۔

تحقیقات سے پتہ چلا کہ مکیش کمار کو ایک عدالت نے 25 جولائی 2025 کو دھوکہ دہی، جعلسازی اور فرضی دستاویزکے جرم میں اشتہاری مجرم قرار دیا تھا۔ اس کے بعد سے وہ عدالتی عمل سے بچتا پھر رہا تھا۔ پولیس حکام کے مطابق ٹیمیں ملزم کی مسلسل تلاش اور اس کے ممکنہ ٹھکانوں پر چھاپے مار رہی تھیں۔

تکنیکی نگرانی، مقامی ذرائع اور مینوئل نگرانی کی مدد سے اس کی نقل و حرکت کا پتہ لگایا گیا، جس سے ہوائی اڈے پر اس کی موجودگی اور اس کی گرفتاری کے بارے میں درست معلومات حاصل کی گئیں۔ پولیس اب اس بات کی تفتیش کر رہی ہے کہ ملزم فرار کے دوران کہاں چھپا ہوا ہو سکتا ہے اور کیا اس دوران وہ کسی اور معاشی جرائم میں ملوث رہا ہے ۔

ہندوستھا ن سماچار

ہندوستان سماچار / محمد شہزاد