سیوان، 5 جون (ہ س)۔

سیوان ریلوے اسٹیشن کے احاطے میں جرائم اور منشیات کی اسمگلنگ کے خلاف چلائی جا رہی مہم کے تحت جی آر پی سیوان، سی پی ڈی ایس ٹیم اور ریلوے پروٹیکشن فورس (آر پی ایف) نے جمعہ کو مشترکہ کارروائی کرتے ہوئے بڑی مقدار میں گانجہ برآمد کیا ہے۔ پلیٹ فارم نمبر-1 پر لاوارث حالت میں پڑے دو پٹھو بیگوں سے کل 12.450 کلوگرام گانجہ ضبط کیا گیا، جس کی تخمینی قیمت تقریباً دو لاکھ روپے بتائی جا رہی ہے۔

موصولہ معلومات کے مطابق سینئر ڈویژنل سیکورٹی کمشنر وارانسی کی ہدایت پر انچارج انسپکٹر جی آر پی سیوان وکاس کمار آزاد اور آر پی ایف کے انچارج انسپکٹر سبھاش چندر یادو کی قیادت میں مشترکہ ٹیم اسٹیشن کے احاطے میں مشکوک سرگرمیوں کی نگرانی کر رہی تھی۔ اسی دوران پلیٹ فارم نمبر-1 کے مشرقی سرے پر بنے نئے فٹ اوور برج کے پاس دو لاوارث بیگ پڑے ہوئے ملے۔ بیگوں کی تلاشی مجسٹریٹ کی موجودگی میں لی گئی، جس کے دوران دونوں بیگوں میں بھورے رنگ کے ٹیپ سے لپٹے ہوئے تین تین پیکٹ ملے۔ جانچ کرنے پر ان پیکٹوں میں گانجہ پایا گیا۔ اس کے بعد پوری قانونی کارروائی مکمل کرتے ہوئے گانجھے کو ضبط کر لیا گیا۔

اس معاملے میں جی آر پی سیوان تھانے میں کیس نمبر 93/26 درج کرتے ہوئے این ڈی پی ایس ایکٹ کی دفعہ 8/20(بی)(دوم)(بی) کے تحت نامعلوم اسمگلروں کے خلاف ایف آئی آر درج کی گئی ہے۔ معاملے کی جانچ پولیس سب انسپکٹر انمول کلوما کو سونپی گئی ہے۔ پولیس حکام کا کہنا ہے کہ برآمد شدہ گانجے کی یہ کھیپ کس کے لیے لائی گئی تھی اور اس کے پیچھے کون سا نیٹ ورک سرگرم ہے، اس کی جانچ کی جا رہی ہے۔ اسٹیشن اور آس پاس کے علاقوں میں لگے سی سی ٹی وی کیمروں کی فوٹیج بھی کھنگالی جا رہی ہے۔

اس کارروائی میں انسپکٹر وکاس کمار آزاد، اے ایس آئی راجیندر سنگھ، اے ایس آئی شیلیندر کمار پانڈے، کانسٹیبل وجے کمار یادو، کانسٹیبل بلبیر سنگھ یادو، کانسٹیبل سبھاش یادو، سپاہی شرون کمار اور سپاہی بھوپیندر کمار نے اہم کردار ادا کیا۔

ہندوستھان سماچار

ہندوستان سماچار / انظر حسن