کولکاتہ، 28 جون (ہ س)۔

مغربی بنگال کے دیہی ترقی اور پنچایتی امور کے وزیر دلیپ گھوش نے اتوار کو اعلان کیا کہ ریاست کے دارالحکومت کولکاتہ میں فٹ پاتھوں اور سڑکوں کے کنارے قائم غیر قانونی ہاکر اسٹالز کو ہٹا دیا جائے گا۔ انہوں نے کہا کہ ریاست کے مختلف ریلوے اسٹیشنوں پر جاری کارروائی کی طرح غیر قانونی تجاوزات ہٹانے کی مہم کولکاتہ میں بھی چلائی جائے گی۔

اتوار کی صبح میڈیا سے بات کرتے ہوئے دلیپ گھوش نے کہا کہ چاہے یہ ریلوے اسٹیشن ہو یا کولکاتہ کے فٹ پاتھ اور سڑک کے کنارے کی جگہیں، یہ کاروبار کے لیے نہیں ہیں۔ انہوں نے واضح طور پر کہا کہ جو لوگ ان جگہوں پر غیر قانونی طور پر قبضہ کر رہے ہیں اور جنہوں نے پہلے اس طرح کی تجاوزات کی حوصلہ افزائی کی تھی انہیں اس بات کو سمجھنا چاہیے۔

انہوں نے کہا کہ فٹ پاتھ اور پیدل چلنے والے راستے عام لوگوں کے لیے ہیں، جو حکومت یا میونسپل اداروں کو ٹیکس ادا کرتے ہیں۔ اس لیے ضروری ہے کہ ان جگہوں کو تجاوزات سے پاک رکھا جائے تاکہ پیدل چلنے والوں کو تکلیف نہ ہو۔

دلیپ گھوش نے یہ بھی کہا کہ کئی جگہوں پر غیر قانونی تجاوزات کی وجہ سے دکانوں کے داخلی راستے بھی بند ہیں، حالانکہ ان دکانوں کے مالکان حکومت کو ٹیکس ادا کرتے ہیں۔ یہ پیدل چلنے والوں اور جائز دکانداروں دونوں کے ساتھ ناانصافی ہے۔

انہوں نے کہا کہ فٹ پاتھوں پر تجاوزات لوگوں کو سڑک کے درمیان چلنے پر مجبور کرتی ہیں جس سے حادثات کا خطرہ بڑھ جاتا ہے۔ کولکاتہ کی سڑکیں پہلے ہی بھاری ٹریفک اور روزانہ ٹریفک جام سے دوچار ہیں۔ ایسے میں پیدل چلنے والوں کی حفاظت اور بھی بڑا مسئلہ بن جاتا ہے۔

ہندوستھان سماچار

ہندوستان سماچار / عطاءاللہ