بھوپال، 27 جون (ہ س)۔ قومی پلس پولیو مہم کے تحت 28 جون، اتوار کو 5 سال تک کی عمر کے بچوں کو پولیو کی دوا پلائی جائے گی۔ مہم کے تحت مدھیہ پردیش کے دارالحکومت بھوپال کے 3 لاکھ 32 ہزار بچوں کو دوا پلائی جائے گی۔

رابطہ عامہ افسر ارون شرما نے ہفتہ کو معلومات دی کہ پولیو دوا پلانے کے لیے ضلع میں 2710 بوتھ بنائے گئے ہیں۔ آنگن واڑی مراکز اور نشان زد سرکاری و نجی اسپتالوں میں یہ بوتھ بنائے گئے ہیں۔ اس کے ساتھ ہی شاپنگ مالز اور بازاروں میں بھی دوا پلانے کے لیے ٹیمیں تعینات کی گئی ہیں۔

انہوں نے بتایا کہ ضلع سے باہر جانے والے اور ضلع میں آنے والے 5 سال تک کے ہر بچے کو دوا پلانے کے لیے ایئرپورٹ، ریلوے اسٹیشن، بس اسٹینڈ وغیرہ مقامات پر ٹرانزٹ بوتھ بنائے گئے ہیں۔ ہائی رسک والے علاقوں جیسے- اینٹ بھٹوں، کریشر، تعمیراتی مقامات اور خانہ بدوش آبادی میں موبائل ٹیمیں تعینات کی گئی ہیں۔

چیف میڈیکل اینڈ ہیلتھ آفیسر بھوپال ڈاکٹر منیش شرما نے بتایا کہ ہندوستان کے پڑوسی ممالک میں پولیو کے کیسز اب بھی سامنے آ رہے ہیں، اس لیے 5 سال تک کے بچوں کو دوا پلانا ضروری ہے۔ ڈاکٹر شرما نے اہل خانہ سے اپیل کی ہے کہ مہم کے پہلے دن بچوں کو بوتھ پر لا کر دوا ضرور پلائیں۔

ہندوستھان سماچار

---------------

ہندوستان سماچار / انظر حسن