گورکھپور، 27 جون (ہ س): وزیر اعلیٰ یوگی آدتیہ ناتھ نے گورکھپور کے دورے کے دوران مسلسل دوسرے دن ہفتہ کی صبح گورکھناتھ مندر میں منعقدہ جنتا درشن میں لوگوں سے ملاقات کی اور ان کے مسائل سنے۔ اس موقع پر انہوں نے رہائش سے محروم مستحق افراد کو سرکاری رہائش فراہم کرنے اور سنگین بیماریوں میں مبتلا افراد کے علاج کے لیے بھرپور مالی امداد دینے کا یقین دلایا۔ انہوں نے کہا کہ ضرورت مندوں کے علاج اور رہائش کا انتظام حکومت کرے گی۔

گورکھناتھ مندر میں ہفتہ کی صبح منعقدہ جنتا درشن کے دوران وزیر اعلیٰ یوگی آدتیہ ناتھ نے تقریباً 200 افراد سے ملاقات کی۔ مہنت دگ وجے ناتھ اسمرتی بھون کے سامنے بیٹھے لوگوں کے درمیان وہ خود پہنچے اور ایک ایک کر کے ان کے مسائل سنے۔ انہوں نے توجہ سے درخواستیں سنیں، عرضیاں وصول کیں اور ان کے ازالے کے لیے متعلقہ انتظامی اور پولیس افسران کو ہدایات جاری کیں کہ تمام مسائل کا مقررہ وقت میں، غیر جانبدارانہ اور مؤثر طریقے سے حل کیا جائے۔ اس موقع پر انہوں نے کہا کہ حکومت ہر مستحق اور اہل شخص کو فلاحی اسکیموں کا فائدہ پہنچانے اور ہر مسئلے کے مؤثر حل کے لیے پُرعزم ہے۔ وزیر اعلیٰ نے افسران کو ہدایت دی کہ وہ عوامی مسائل کے تئیں حساس رویہ اختیار کریں۔

جنتا درشن کے دوران ایک خاتون نے وزیر اعلیٰ یوگی سے کہا کہ ان کے پاس رہنے کے لیے اپنا گھر نہیں ہے۔

وزیر اعلیٰ نے یقین دلایا کہ انہیں حکومت کی رہائشی اسکیم کے تحت مکان فراہم کیا جائے گا۔ ہر بار کی طرح اس مرتبہ بھی کئی افراد علاج کے لیے مالی امداد کی درخواست لے کر آئے تھے۔ وزیر اعلیٰ نے انہیں یقین دلایا کہ مالی وسائل کی کمی کے باعث کسی کا علاج نہیں رکے گا۔ نئی دہلی کے ایمس میں زیر علاج ایک خاتون کو انہوں نے وزیر اعلیٰ ریلیف فنڈ سے مالی امداد فراہم کرنے کا وعدہ کیا۔ ایک دوسری خاتون کی علاج سے متعلق شکایت سننے کے بعد انہوں نے افسران کو ہدایت دی کہ ان کے علاج کا انتظام گورکھپور ایمس یا بی آر ڈی میڈیکل کالج میں کیا جائے۔

زمین پر ناجائز قبضے سے متعلق شکایات پر وزیر اعلیٰ یوگی آدتیہ ناتھ نے پولیس کو ہدایت دی کہ اگر کوئی بااثر شخص کسی کی زمین پر زبردستی قبضہ کرے تو اس کے خلاف سخت کارروائی کی جائے۔

جنتا درشن میں اہل خانہ کے ساتھ آئے بچوں سے بھی وزیر اعلیٰ یوگی آدتیہ ناتھ نے محبت کا اظہار کیا، انہیں دعائیں دیں اور پڑھائی کی ترغیب دیتے ہوئے چاکلیٹ بھی تقسیم کیں۔ انہوں نے والدین سے کہا کہ وہ اپنے بچوں کو ضرور اسکول بھیجیں۔

ہندوستھان سماچار

---------------

ہندوستان سماچار / عبدالواحد