آکلینڈ، 20 جون (ہ س)۔

ہندوستانی خواتین ہاکی ٹیم نے اپنی متاثر کن کارکردگی کو جاری رکھتے ہوئے اپنی مسلسل چوتھی جیت درج کی اورایف آئی ایچ خواتین ہاکی نیشنز کپ 2025-26 نیوزی لینڈ کے فائنل کے لیے پیش قدمی کرتے ہوئے ہفتہ کو چلی کو یکطرفہ مقابلے میں 6-0 سے شکست دی۔

اس شاندار فتح میں نونیت کور اور دیپیکا نے دو دو گول کیے جبکہ نیہا اور رتوجا داداسو پسال نے ایک ایک گول کیا۔ کپتان سلیمہ ٹیٹے کو بہترین آل راو¿نڈ کارکردگی پر میچ کی بہترین کھلاڑی قرار دیا گیا۔

بھارت کا مقابلہ اب فائنل میں امریکہ اور میزبان نیوزی لینڈ کے درمیان دوسرے سیمی فائنل کے فاتح سے ہوگا۔

ہندوستان نے میچ کے آغاز سے ہی کنٹرول برقرار رکھا اور چھٹے منٹ میں اپنے پہلے پنالٹی کارنر کو گول میں بدل کر برتری حاصل کر لی۔ نونیت کور کے درست شاٹ نے ہندوستان کو 1-0 کی برتری دلا دی۔

13ویں منٹ میں کپتان سلیمہ ٹیٹے نے بائیں جانب سے ایک شاندار موو بنایا اور گیند نونیت کو دے دی جنہوں نے اپنا دوسرا گول کرکے ہندوستان کی برتری کو دوگنا کردیا۔

اس کے بعد دیپیکا نے 14ویں اور 18ویں منٹ میں لگاتار دو پنالٹی کارنرز کو تبدیل کر کے ہندوستان کو پہلے ہاف میں 4-0 کی برتری دلائی۔

ان دو گولوں کے ساتھ، دیپیکا کا ٹورنامنٹ میں مجموعی طور پر چھ گول ہو گیا، جس سے وہ ٹاپ اسکورر بن گئیں۔

ہندوستانی ٹیم نے دوسرے ہاف میں بھی جارحانہ کھیل جاری رکھا۔ نیہا نے 32ویں منٹ میں پنالٹی کارنر کو گول کر کے اسکور کو 5-0 کر دیا۔ اس کے بعد ریتوجا داداسو پسال نے 39ویں منٹ میں اوپن پلے سے ایک شاندار ریورس شاٹ کے ذریعے ہندوستان کا چھٹا گول کیا۔

چلی نے آخری کوارٹر میں کئی مواقع پیدا کیے لیکن ہندوستانی گول کیپر سویتا نے شاندار سیو کر کے مخالف کو ناکام بنا دیا۔

ہندوستان نے آخر تک اپنا تسلط برقرار رکھا اور 6-0 کی فتح کے ساتھ ٹائٹل میچ میں جگہ پکی کرلی۔

ہندوستھان سماچار

ہندوستان سماچار / عطاءاللہ