ویمنز ٹی20 ورلڈ کپ 2026 : بڑے اپ سیٹ سے بچی نیوزی لینڈ کی ٹیم، آئرلینڈ کو 4 رن سے ہرایا

ساوتھمپٹن، 20 جون (ہ س)۔ ویمنز ٹی20 ورلڈ کپ 2026 میں موجودہ چیمپئن نیوزی لینڈ نے جمعہ کی دیر رات انتہائی سنسنی خیز مقابلے میں آئرلینڈ کو 4 رن سے ہرا کر ٹورنامنٹ میں اپنی پہلی جیت درج کی۔ مسلسل دو شکستوں کے بعد دباو میں اتری نیوزی لینڈ کی ٹیم آخر تک جدوجہد کرتی رہی اور مشکل مقابلے میں دو اہم پوائنٹس حاصل کر کے ٹورنامنٹ میں اپنی امیدیں قائم رکھیں۔

141 رنوں کے ہدف کا تعاقب کرنے اتری آئرلینڈ کی شروعات اچھی نہیں رہی، لیکن کپتان گیبی لوئس اور اورلا پرینڈرگاسٹ نے شاندار بلے بازی کرتے ہوئے میچ کو نیوزی لینڈ کے ہاتھوں سے تقریباً چھین لیا۔ دونوں نے دوسری وکٹ کے لیے 95 گیندوں میں 110 رن جوڑ کر ٹیم کو جیت کی دہلیز تک پہنچا دیا۔ اورلا پرینڈرگاسٹ نے گیند اور بلے دونوں سے شاندار کارکردگی کا مظاہرہ کرتے ہوئے پہلے 2 وکٹیں حاصل کیں اور پھر 53 گیندوں پر 59 رن بنائے۔ وہیں کپتان گیبی لوئس نے 53 گیندوں میں 58 رن کی اہم اننگز کھیلی۔

ایک وقت آئرلینڈ کو آخری چار اووروں میں 34 رن چاہیے تھے اور اس کی نو وکٹیں باقی تھیں۔ لیکن یہیں سے نیوزی لینڈ نے واپسی کی۔ جیس کیر اور کپتان امیلیا کیر نے دباو بنایا۔ امیلیا نے 18ویں اوور میں دو وکٹیں لے کر مقابلے کا رخ بدل دیا۔

آخری اوور میں آئرلینڈ کو 15 رن چاہیے تھے۔ کپتان امیلیا کیر نے تجربہ کار سوزی بیٹس کو گیند سونپی۔ سوزی نے شاندار صبر و تحمل کا مظاہرہ کرتے ہوئے بلے بازوں کو بڑے شاٹ نہیں لگانے دیے اور مقابلہ نیوزی لینڈ کے حق میں کر دیا۔ آئرلینڈ آخری گیند پر 6 رن نہ بنا سکی اور جیت سے محض چار رن دور رہ گئی۔

اس سے پہلے نیوزی لینڈ کا آغاز انتہائی خراب رہا اور ٹیم صرف 10 رن پر 3 وکٹیں گنوا بیٹھی۔ اورلا پرینڈرگاسٹ اور کارا مرے نے ابتدائی جھٹکے دیے۔ اس کے بعد بروک ہالیڈے اور ازی شارپ نے مفید اننگز کھیلتے ہوئے ٹیم کو معزز اسکور تک پہنچایا۔ ازی شارپ نے 28 گیندوں میں 36 رن بنائے، جب کہ بروک ہالیڈے نے 34 رن کی اہم اننگز کھیلی۔ آخری اووروں میں نیوزی لینڈ نے تیزی سے رن جوڑے اور ایک چیلنجنگ ہدف کھڑا کیا۔

مختصر اسکور:

نیوزی لینڈ – 140/6 (20 اوور) ازی شارپ 36، بروک ہالیڈے 34، اورلا پرینڈرگاسٹ 2/26، کارا مرے 2/26

آئرلینڈ – 136/4 (20 اوور) اورلا پرینڈرگاسٹ 59، گیبی لوئس 58، امیلیا کیر 2/23

نتیجہ: نیوزی لینڈ 4 رن سے فاتح۔

ہندوستھان سماچار

---------------

ہندوستان سماچار / انظر حسن