برلن، 20 جون (ہ س)۔ جرمنی کی اہم اپوزیشن جماعت دی لیفٹ (ڈی لنکے) نے پہلی بار سرکاری طور پر غزہ پٹی میں اسرائیل کی فوجی کارروائی کو نسل کشی قرار دیا ہے۔ یہ فیصلہ ہفتہ کے روز جرمنی کے مشرقی شہر پوٹسڈام میں منعقدہ جماعت کے قومی اجلاس میں بھاری اکثریت سے منظور کی گئی ایک قرارداد کے ذریعے کیا گیا۔
ترکیہ کی سرکاری خبر رساں کمیٹی انادولو نے جرمن خبر رساں ایجنسی ڈی پی اے کے حوالے سے بتایا کہ قرارداد میں کہا گیا ہے: بین الاقوامی تنظیمیں، انسانی حقوق کی تنظیمیں اور بین الاقوامی قانون کے متعدد ماہرین غزہ میں فلسطینیوں کے خلاف نسل کشی کی بات کرتے ہیں۔ ہم اس مؤقف سے اتفاق کرتے ہیں۔
جماعت نے اپنی قرارداد میں اسرائیل اور فلسطین دونوں کے حقِ وجود کی حمایت کا بھی اعادہ کیا۔ قرارداد میں کہا گیا کہ یہودیوں کے لیے محفوظ پناہ گاہ کے طور پر اسرائیل کی تاریخی اور موجودہ اہمیت ہے، جبکہ فلسطین کے وجود اور وہاں رہنے والے تمام لوگوں کے مساوی حقوق کی بھی حمایت کی جانی چاہیے۔
قابلِ ذکر ہے کہ اسرائیل نے اکتوبر 2023 میں غزہ میں اپنا فوجی آپریشن شروع کیا تھا۔ فلسطینی اعداد و شمار کے مطابق اس حملے میں 73,000 سے زائد فلسطینی جاں بحق اور 173,000 سے زیادہ زخمی ہوئے ہیں، جن میں زیادہ تر خواتین اور بچے شامل ہیں۔ اس کے علاوہ علاقے کے بیشتر شہری بنیادی ڈھانچے کو شدید نقصان پہنچا ہے۔ اگرچہ 10 اکتوبر 2025 سے جنگ بندی نافذ ہے، تاہم اسرائیلی حملے اور پابندیاں بدستور جاری ہیں، جس کے نتیجے میں جنگ بندی کے نفاذ کے بعد بھی 1,000 سے زائد مزید فلسطینی ہلاک ہو چکے ہیں۔
لیفٹ پارٹی کا یہ مؤقف جرمن سیاست میں ایک اہم پیش رفت تصور کیا جا رہا ہے، کیونکہ جرمنی کی مرکزی دھارے کی بیشتر جماعتیں اب تک اسرائیل کے نسبتاً حامی مؤقف پر قائم رہی ہیں۔ ایسے میں اپوزیشن جماعت کی جانب سے غزہ کی صورتِ حال کو نسل کشی قرار دینا سیاسی اور سفارتی بحث کو مزید تیز کر سکتا ہے۔
ہندوستھان سماچار
---------------
ہندوستان سماچار / عبدالواحد
