جکارتہ، 2 جون (ہ س)۔

ہندوستان کی اسٹار شٹلر پی وی سندھو نے منگل کو خواتین کے سنگلز زمرے میں شاندار فتح کے ساتھ انڈونیشیا اوپن 2026 کے آخری 16 (پری کوارٹر فائنل) میں جگہ بنالی۔ اس دوران مردوں کے سنگلز میں کدامبی سری کانت اور خواتین کے سنگلز میں مالویکا بنسوڑ کو پہلے راؤنڈ میں شکست کا سامنا کرنا پڑا۔

دو بار کی اولمپک تمغہ جیتنے والی سندھو کو تھائی لینڈ کی بوسانان اونگبامرنگفن کے خلاف سخت چیلنج کا سامنا کرنا پڑا، لیکن وہ 51 منٹ کے مقابلے میں 25-23، 21-16 سے جیت گئیں۔

سابق عالمی چمپئن سندھو نے پہلا گیم قریبی مقابلے میں جیتا اور دوسرے میں اپنی رفتار برقرار رکھتے ہوئے سیدھے گیمز میں میچ جیت لیا۔

اب وہ اگلے راؤنڈ میں موجودہ اولمپک چمپئن اور عالمی نمبر 1 این سی ینگ سے مقابلہ کر سکتی ہیں۔ سندھو کو پچھلے ہفتے سنگاپور اوپن کے کوارٹر فائنل میں این سی ینگ سے شکست کا سامنا کرنا پڑا تھا۔ دونوں کھلاڑیوں کے درمیان اب تک کھیلے گئے نو میچوں میں سندھو نے ایک بھی میچ نہیں جیتا ہے۔

دوسری جانب سابق عالمی نمبر ایک کدامبی سری کانت کی مہم پہلے راؤنڈ میں ختم ہوگئی۔ انہیں جاپان کے یوشی تاناکا نے 21-19، 21-15 سے شکست دی۔

خواتین کے سنگلز میں مالویکا بنسوڑ بھی پہلے راؤنڈ کی رکاوٹ عبور کرنے میں ناکام رہیں۔ انہیں ساتویں نمبر کی تھائی کھلاڑی پورنپاوی چوچوونگ نے 21-12، 21-10 سے شکست دی۔

تاہم مردوں کے ڈبلز میں ہندوستان کو کامیابی ملی۔ ہری ہرن امساکارونن اور ایم آر ارجن کی جوڑی نے ملائیشیا کے نور محمد ازرین ایوب اور تان وی کیونگ کو 21-18، 21-10 سے شکست دے کر دوسرے راو¿نڈ میں جگہ بنائی۔

دن کے آخر میں، ہندوستان کی خواتین کی ڈبلز جوڑی ترشا جولی-گیتھری گوپی چند، لکشیہ سین کی مردوں کی سنگلز جوڑی، اور دھرو کپیلا اور تنیشا کرسٹو کی مکسڈ ڈبلز جوڑی اپنی مہم کا آغاز کریں گی۔

ہندوستھان سماچار

ہندوستان سماچار / عطاءاللہ