نوئیڈا، 17 جون (ہ س)۔ نوئیڈا کے سیکٹر 33 میں رجسٹری آفس کمپلیکس میں بدھ کو ساتویں دن بھی وکلاءکی ہڑتال جاری رہی۔ بار ایسوسی ایشن کے صدر پروین ڈیڑھا کی قیادت میں وکلاءنے حکومت کے ای-رجسٹریشن سسٹم کے خلاف سخت احتجاج کرتے ہوئے ریاست کے ا سٹیمپ اور رجسٹریشن کے وزیر رویندر جیسوال کا پتلا جلایا۔
اس موقع پر وکلاء، ڈیڈ رائٹرز اور اسٹیمپ وینڈرز نے متفقہ طور پر کہا کہ ای-رجسٹریشن سسٹم روایتی نظام اور اس سے وابستہ ہزاروں لوگوں کی روزی روٹی پر برا اثر ڈالے گا۔ مظاہرین نے حکومت سے مطالبہ کیا کہ اس نظام کو فوری طور پر واپس لیا جائے اور متعلقہ فریقین سے بات چیت کرکے اس کا عملی حل نکالا جائے۔ نوئیڈا بار ایسوسی ایشن نے واضح کیا کہ جب تک ان کے مطالبات پر کوئی مثبت فیصلہ نہیں لیا جاتا احتجاج اور ہڑتال جاری رہے گی۔ بار ایسوسی ایشن کے صدر نے کہا کہ اگر حکومت نے ان کے مطالبات تسلیم نہ کیے تو وہ پیر سے غیر معینہ مدت کی بھوک ہڑتال پر جائیں گے۔
گریٹر نوئیڈا کے سیکٹر گاما 2 میں رجسٹری آفس میں بھی بدھ کو کام مکمل طور پر ٹھپ ہو گیا۔ ای رجسٹریشن سسٹم کے خلاف وکلاءاور ڈیڈ رائٹرز ہڑتال پر ہیں۔ ہڑتال کی وجہ سے گزشتہ چار دنوں کے دوران ضلع میں 4000 سے زائد رجسٹری نہیں ہوسکی ہے۔ جس سے حکومت کو کروڑوں روپے کا نقصان ہو رہا ہے۔
---------------
ہندوستان سماچار / عبدالسلام صدیقی
