دارجلنگ، 17 جون (ہ س)۔ پہاڑی سیاست میں ایک اہم پیش رفت ہوئی ہے۔ وزیر اعلی شبھیندو ادھیکاری کی طرف سے گورکھا لینڈ ٹیریٹورل ایڈمنسٹریشن (جی ٹی اے) کے اندر مبینہ بدعنوانی پر فائلیں کھولنے کی دھمکی کے صرف 24 گھنٹے بعد، جی ٹی اے کے چیئرمین انت تھاپا نے اپنے عہدے سے استعفیٰ دے دیا ہے۔ ساتھ ہی، انہوں نے جی ٹی اے کونسلر کی حیثیت سے بھی استعفیٰ دے دیا ہے۔

اس پورے واقعہ کو لے کر سیاسی حلقوں میں ہلچل مچ گئی ہے۔

انت تھاپا نے بدھ کو ایک سوشل میڈیا پوسٹ کے ذریعے اپنے استعفیٰ کا اعلان کیا اور مبینہ بدعنوانی کی تحقیقات کے مطالبے کی بھی حمایت کی۔ انہوں نے لکھا کہ ریاست میں تبدیلی آچکی ہے اور عوام نے اس حکومت کو قبول کرلیا ہے۔ جی ٹی اے کے بارے میں عوامی غصہ ہے اور ہر کوئی تحقیقات چاہتا ہے اور وہ خود بھی اس کے حق میں ہیں۔

انہوں نے یہ بھی کہا کہ جی ٹی اے کو زیادہ فنڈنگ نہیں ملی لیکن اس کے باوجود عوام میں عدم اطمینان بڑھ گیا۔ اس لیے انہوں نے چیئرمین اور کونسلر دونوں عہدوں سے مستعفی ہونے کا فیصلہ کیا۔

ادھر ریاست میں اقتدار کی تبدیلی سے پہاڑی سیاست میں بھی ہلچل بڑھ گئی ہے۔ ترنمول کانگریس کی پچھلی حکومت کے دوران جی ٹی اے میں بڑے پیمانے پر بدعنوانی کے الزامات سامنے آرہے تھے۔

وزیراعلیٰ شبھیندو ادھیکاری نے منگل کو کرسیونگ میں ایک عوامی بہبود کیمپ سے خطاب کرتے ہوئے کہا کہ پچھلی حکومت کے دوران بڑے پیمانے پر بے ضابطگیاں ہوئیں، خاص طور پر اساتذہ کی بھرتی میں۔ انہوں نے واضح کیا کہ اب ایسا نہیں ہوگا اور یہ کہ ان کی حکومت نہ میں کھاوں گا اور نہ دوسروں کو کھانے دوں گا کی پالیسی پر کام کرے گی۔

غور طلب ہے کہ جی ٹی اے کے ذریعے اساتذہ کی بھرتی میں مبینہ بدعنوانی کے معاملے میں پہلے ہی سی بی آئی جانچ کا حکم دیا جا چکا ہے۔ اس واقعے کے 24 گھنٹے کے اندر انت تھاپا کا استعفیٰ کئی سوال اٹھاتا ہے۔

اب سب سے بڑا سوال یہ ہے کہ جی ٹی اے کی باگ ڈور کون سنبھالے گا۔ کیا بمل گرونگ کی واپسی ہوگی؟ اس حوالے سے سیاسی بحثیں تیز ہو گئی ہیں۔

---------------

ہندوستان سماچار / عبدالسلام صدیقی