نئی دہلی، 17 جون (ہ س)۔

پچھلے سال اینڈیگو ایئر لائنز کے بحران کے بعد، شہری ہوا بازی کی وزارت کے ذریعہ قائم کردہ مسافر امدادی کنٹرول روم (پی اے سی آر) نے ہوائی مسافروں کو اہم راحت پہنچائی ہے۔ اس عرصے کے دوران 75,000 سے زائد شکایات میں سے 73,000 سے زیادہ کو تسلی بخش طریقے سے حل کیا گیا ہے، اور اب اس کی کارکردگی کو 100 فیصد تک بڑھانے کے لیے مصنوعی ذہانت کا استعمال کیا جائے گا۔

شہری ہوا بازی کے سکریٹری سمیر کمار سنہا نے آج یہاں بھون میں نامہ نگاروں سے بات کرتے ہوئے کہا کہ مسافر امدادی کنٹرول روم کی ابتدائی کامیابی کے بعد اس کی کارکردگی کو بڑھانے کی کوششیں جاری ہیں جس میں اے آئی کا استعمال بھی شامل ہے۔

سنہا نے کہا کہ پی اے سی آر نے 98 فیصد کامیابی کی شرح کے ساتھ 73,000 مسافروں کی شکایات کو حل کیا ہے۔

شہری ہوا بازی کی وزارت نے رکاوٹوں کے دوران مسافروں کی شکایات کو فوری طور پر حل کرنے کے لیے 24x7 مسافر امدادی کنٹرول روم (پی اے سی آر) قائم کیا ہے۔پی اے سی آر شہری ہوا بازی کی وزارت کی قیادت میں، ایئر لائنز، ہوائی اڈوں، سول ایوی ایشن کے ڈائریکٹوریٹ جنرل (ڈی جی سی اے)، بیورو آف سول ایوی ایشن سیکیورٹی (بی سی اے ایس) اور ایئرپورٹس اتھارٹی آف انڈیا (اے اے آئی) کے نمائندوں کو اکٹھا کرتا ہے، جو پھنسے ہوئے مسافروں کی فوری مدد کو یقینی بناتا ہے۔

ہوائی خدمات، ای میلز، سوشل میڈیا اور کالز کے ذریعے موصول ہونے والی شکایات کو فوری کارروائی کے لیے پی اے سی آر میں جمع کیا جاتا ہے۔ 10 دسمبر سے، 73,000 سے زیادہ مسافروں کی شکایات کو حل کیا جا چکا ہے، جن کی مجموعی حل کی شرح 98 فیصد ہے۔

ہندوستھان سماچار

ہندوستان سماچار / عطاءاللہ