شولاپور، 14 جون (ہ س)۔ منگل ویدھا تعلقہ کے پاتھکھل گاؤں میں محکمہ زراعت کی کارروائی کے دوران کھاد کے نام پر نمک فروخت کیے جانے کا چونکا دینے والا معاملہ سامنے آیا ہے۔ اس کارروائی میں تقریباً 10 لاکھ 46 ہزار 780 روپے مالیت کی ملاوٹی کیمیائی کھاد کا ذخیرہ ضبط کیا گیا، جبکہ اس معاملے میں دو افراد کے خلاف منگل ویدھا پولیس تھانے میں مقدمہ درج کر لیا گیا ہے۔موصولہ اطلاعات کے مطابق کسانوں کی جانب سے موصول ہونے والی شکایات کے بعد ضلع زرعی افسر اور منگل ویدھا محکمہ زراعت کی ٹیم نے پاتھکھل میں واقع میسرز پراہار ادیوگ گروپ اینڈ کرشی کیندر کی دکان اور گودام پر چھاپہ مارا۔ جانچ کے دوران یہ بات سامنے آئی کہ کھاد کے طور پر نمک فروخت کیا جا رہا تھا۔ مزید تفتیش میں ملاوٹی کیمیائی کھاد کا ذخیرہ رکھنے اور اس کی فروخت کیے جانے کا بھی انکشاف ہوا۔کارروائی کے دوران متعلقہ افراد سے کھاد کی فروخت سے متعلق بلوں اور دیگر ضروری دستاویزات طلب کی گئیں، تاہم وہ مطلوبہ دستاویزات پیش کرنے میں ناکام رہے۔ شکایت میں اس بات کا بھی ذکر کیا گیا ہے کہ ضبط شدہ سامان کے قانونی ریکارڈ اور خرید و فروخت کے ثبوت فراہم نہیں کیے جا سکے۔ اس معاملے میں ستیش منوہر بھوسلے (ساکن پاتھکھل) اور روی راج شنکر کانسے (ساکن ساتارا) کے خلاف مختلف دفعات کے تحت مقدمہ درج کیا گیا ہے۔پولیس اور محکمہ زراعت اس معاملے کی مزید تفتیش کر رہے ہیں۔ اس کارروائی کے بعد علاقے کے کسانوں میں تشویش کی لہر دوڑ گئی ہے، جبکہ ملاوٹی کھاد کی فروخت کے خلاف انتظامیہ کی کارروائی کو اہم قدم قرار دیا جا رہا ہے۔

ہندوستھان سماچار

--------------------

ہندوستان سماچار / جاوید این اے