جون پور،13 جون (ہ س )۔اتر پردیش کے جون پور ضلع میں پولیس نے ہفتے کے روز ایک بدنام مجرم کو ایک کمپنی کے نام پر لوگوں کو دھوکہ دے کر کروڑ روپے کے سائبر فراڈ کرنے کے الزام میں گرفتار کیا۔ پولیس نے ملزم کے قبضے سے بڑی مقدار میں موبائل فون، سم کارڈ، جعلی دستاویزات، بینک اکاونٹ کے ریکارڈ اور نقد رقم برآمد کی ہے۔

ایڈیشنل سپرنٹنڈنٹ آف پولیس (سٹی) آیوش سریواستو نے ہفتے کے روز معاملہ کا انکشاف کرتے ہوئے کہا کہ گرفتار ملزم، شبھم سنگھ (30)، جو پاپراون کا رہائشی ہے، ایک کمپنی میں قرض، سرمایہ کاری، ٹور اور ٹریول اور انشورنس پیکیج حاصل کرنے کے نام پر لوگوں کو دھوکہ دیتا تھا۔ وہ جعلی ویب سائٹس اور آن لائن ذرائع کے ذریعے گاہکوں سے رابطہ کرتا تھا اور انہیں فون اور واٹس ایپ پر اعتماد میں لیتا تھا۔

ملزم متاثرین سے دستاویزات لے کر پروسیسنگ فیس، تصدیق فیس، انشورنس، کیش بیک اور قرض کی منظوری فیس کے نام پر ان سے رقم وصول کرتاتھا۔ تحقیقات سے پتہ چلا کہ اس نے جعلی پتے کے ساتھ جعلی آدھار کارڈ تیار کیے تھے جس کے ذریعے جعلی سم کارڈ حاصل کیے گئے تھے۔ پولیس نے ملزم سے تین اینڈرائڈ موبائل، تین کی پیڈ موبائل، چار سم کارڈ، ایک جعلی آدھار کارڈ، ایک جعلی آدھار فوٹو کاپی، ایک حقیقی آدھار کارڈ، 15 اے ٹی ایم کارڈ، نو بینک پاس بک، سات چیک بک اور 1 لاکھ روپے نقد برآمد کیے ہیں۔

تفتیش کے دوران یہ بات سامنے آئی کہ ملزم نے اپنے، اپنے خاندان کے افراد اور جاننے والوں کے نام پر کئی بینک کھاتے کھولے تھے۔ سائبر فراڈ سے حاصل ہونے والی رقم ان کھاتوں میں منتقل کی گئی اور بعد میں اے ٹی ایم، چیک بک اور سی ایس سی مراکز کے ذریعے نکالی گئی۔ اس گروہ نے اب تک 2.5 کروڑ روپے سے زیادہ کے سائبر فراڈ کا ارتکاب کیا ہے۔ اس معاملہ میں ملزم کے بھائی، بہن اور بہنوئی کے اکاو¿نٹس کی بھی تحقیقات کی جا رہی ہیں۔

---------------

ہندوستان سماچار / عبدالسلام صدیقی