ابھشیک بنرجی کی رہائش گاہ پر علی الصبح پولیس کا چھاپہ، پانچ گھنٹے تک تلاشی چلی

۔ ٹی ایم سی رکنِ پارلیمنٹ نے تالا توڑ کر چھان بین کا الزام لگایا

کولکاتا، 13 جون (ہ س)۔ ترنمول کانگریس کے قومی جنرل سکریٹری اور رکنِ پارلیمنٹ ابھشیک بنرجی کی کالی گھاٹ میں واقع رہائش گاہ پر ہفتے کی علی الصبح پولیس نے وسیع تلاشی مہم چلائی۔ ریاستی پولیس اور کولکاتا پولیس کے حکام اور جوانوں کی بڑی تعداد صبح تقریباً 3 بجے کے بعد ان کی رہائش گاہ پر پہنچی۔ طویل وقت تک دروازہ کھٹکھٹانے کے بعد پولیس مبینہ طور پر تالا توڑ کر گھر میں داخل ہوئی اور کئی گھنٹوں تک تلاشی لی۔

ذرائع کے مطابق، تلاشی مہم کے دوران مرکزی فورسز کے جوان بھی رہائش گاہ کے باہر تعینات رہے۔ واقعے کی اطلاع ملنے پر مغربی بنگال کی سابق وزیر اعلیٰ ممتا بنرجی بھی کالی گھاٹ میں واقع رہائش گاہ پر پہنچیں۔ صبح تقریباً 8 بجے پولیس ٹیم کے باہر نکلنے کے بعد سابق وزیر اعلیٰ بھی وہاں سے روانہ ہو گئیں۔ تلاشی مہم ختم ہونے کے بعد ابھشیک بنرجی نے میڈیا سے بات چیت میں کہا کہ پولیس نے تالا توڑ کر پورے گھر کی تلاشی لی ہے اور پوری کارروائی کا ریکارڈ دستیاب ہے۔ تاہم، پولیس کس کیس کی جانچ کے سلسلے میں ان کی رہائش گاہ پر پہنچی تھی، اس کی سرکاری معلومات ابھی تک سامنے نہیں آئی ہیں۔ بتایا جا رہا ہے کہ شالبنی تھانہ علاقے کی پولیس اس کارروائی میں شامل تھی اور ٹیم میں خاتون افسران بھی موجود تھیں۔

مقامی لوگوں کے مطابق، پولیس اور مرکزی فورسز کے جوان علی الصبح سے ہی رہائش گاہ کے باہر تعینات تھے۔ کئی پولیس گاڑیاں بھی موقع پر کھڑی کی گئی تھیں۔ صبح 7 بجے کے بعد کچھ افسران گھر سے باہر نکلے اور آپس میں تبادلۂ خیال کرنے کے بعد دوبارہ اندر چلے گئے۔ قریب پانچ گھنٹے تک جاری رہنے والی کارروائی کے بعد پولیس ٹیم نے احاطہ چھوڑا۔

یہ واقعہ ایسے وقت میں پیش آیا ہے جب ابھشیک بنرجی لگاتار مختلف کیسز میں جانچ ایجنسیوں کے سامنے پیش ہو رہے ہیں۔ حال ہی میں اسمبلی میں مبینہ دستخطی فرضی واڑے کیس میں ریاست کے کرائم انویسٹی گیشن ڈپارٹمنٹ (سی آئی ڈی) نے ان سے پوچھ گچھ کی تھی۔ کلکتہ ہائی کورٹ کی ہدایت کے بعد وہ بھوانی بھون میں واقع سی آئی ڈی ہیڈ کوارٹر پہنچے تھے، جہاں ان سے تقریباً ساڑھے پانچ گھنٹے تک پوچھ گچھ کی گئی تھی۔ مذکورہ کیس میں عدالت نے جانچ جاری رکھنے کی اجازت دی ہے، لیکن ساتھ ہی یہ بھی کہا ہے کہ دو ہفتوں تک ابھشیک بنرجی کے خلاف کوئی سخت قدم نہیں اٹھایا جائے گا۔ عدالت نے انہیں جانچ میں پورا تعاون کرنے کی ہدایت دی ہے۔

اس کے علاوہ جمعہ کے روز بھی سی آئی ڈی کی ایک ٹیم ابھشیک بنرجی کی کالی گھاٹ میں واقع رہائش گاہ پر پہنچی تھی۔ یہ کارروائی انتخابی مہم کے دوران بی جے پی کارکنوں اور امت شاہ کے خلاف اشتعال انگیز بیان کے معاملے میں درج سائبر شکایت کے سلسلے میں کی گئی تھی۔ حکام نے انہیں نوٹس سونپتے ہوئے 16 جون کو پوچھ گچھ کے لیے حاضر ہونے کی ہدایت دی تھی۔ وہیں، دستخطی فرضی واڑے کیس میں انہیں 14 جون کو دوبارہ بھوانی بھون میں حاضر ہونے کے لیے کہا گیا ہے۔

اسی دوران پرائمری ٹیچر بھرتی دھاندلی کیس کی جانچ کر رہے انفورسمنٹ ڈائریکٹوریٹ (ای ڈی) نے بھی ابھشیک بنرجی کو 15 جون کو طلب کیا ہے۔ لگاتار مل رہے سمن اور جانچ ایجنسیوں کی سرگرمی کے درمیان ہفتے کی یہ پولیس کارروائی سیاسی حلقوں میں بحث کا موضوع بن گئی ہے۔

ہندوستھان سماچار

---------------

ہندوستان سماچار / انظر حسن