جموں, 31 مئی (ہ س)۔ جموں و کشمیر کے ضلع سانبہ کے رام گڑھ علاقے میں ایک مندر کے کنویں کی صفائی کے دوران ایک زندہ مارٹر شیل برآمد ہوا، جس کے بعد پولیس اور بم ناکارہ بنانے والے دستے نے فوری کارروائی کرتے ہوئے اسے محفوظ طریقے سے ناکارہ بنا دیا۔
اطلاعات کے مطابق گاؤں گڑوال میں واقع ایک کنویں کی صفائی کے دوران مقامی نوجوان رضاکاروں اور مندر انتظامیہ کے ارکان کو کنویں کی تہہ میں ایک مشتبہ دھماکہ خیز شے نظر آئی۔ اس کی اطلاع فوری طور پر پولیس کو دی گئی۔
تھانہ رام گڑھ کے پولیس اہلکار موقع پر پہنچے اور مارٹر شیل کو کنویں سے نکال کر اپنی تحویل میں لے لیا۔ بعد ازاں بم اسکواڈ کو طلب کیا گیا، جس نے شیل کو دیویکا علاقے میں لے جا کر کامیابی کے ساتھ ناکارہ بنا دیا۔
پولیس کے مطابق برآمد ہونے والا مارٹر شیل کافی پرانا معلوم ہوتا ہے اور امکان ظاہر کیا جا رہا ہے کہ یہ گزشتہ تین سے چار دہائیوں سے کنویں میں پڑا ہوا تھا۔
واقعے کے بعد علاقے میں خوف و ہراس پھیل گیا، تاہم پولیس اور بم اسکواڈ کی بروقت کارروائی سے کسی بھی ممکنہ حادثے کو ٹال دیا گیا۔
ہندوستھان سماچار
---------------
ہندوستان سماچار / محمد اصغر
