شملہ میں تیز بارش سے اندھیرا چھایا، مئی میں سردی کی واپسی، کئی اضلاع میں الرٹ جاری

شملہ، 03 مئی (ہ س)۔ ہماچل پردیش کے دارالحکومت شملہ میں اتوار کی صبح موسم نے اچانک ایسا رخ بدلا کہ دن کے اجالے میں ہی اندھیرا چھا گیا۔ مئی کے مہینے کے آغاز میں عام طور پر جہاں درجہ حرارت بڑھنے لگتا ہے، وہیں شملہ میں تیز بارش، آندھی اور گھنے بادلوں نے موسم کو پھر سرد بنا دیا ہے۔ آج صبح کا آغاز صاف اور دھوپ والے موسم سے ہوا تھا۔ لیکن تقریباً 8 بجے کے بعد اچانک کالے بادل چھا گئے۔ تیز گرج چمک اور آندھی کے ساتھ بارش شروع ہوئی اور کچھ ہی منٹوں میں حالات ایسے ہو گئے مانو شام ہو گئی ہو۔ شہر کے کئی حصوں میں حدِ نگاہ کم ہو گئی اور لوگوں کو لائٹیں جلانی پڑیں۔

اس غیر متوقع تبدیلی نے مقامی باشندوں کے ساتھ ساتھ سیاحوں کو بھی حیران کر دیا ہے۔

بارش کی وجہ سے درجہ حرارت میں بھاری گراوٹ درج کی گئی ہے۔ ٹھنڈی ہواوں کی وجہ سے لوگوں کو پھر سے گرم کپڑے پہننے پڑے۔ گزشتہ کچھ دنوں سے شملہ میں موسم مسلسل بدل رہا ہے۔ ہفتہ کی شام کو بھی ہلکی سے درمیانی بارش ہوئی تھی، حالانکہ رات میں موسم صاف رہا۔ محکمہ موسمیات نے انتباہ جاری کرتے ہوئے بتایا ہے کہ ریاست کے کئی اضلاع میں اگلے 24 سے 48 گھنٹوں کے دوران موسم خراب رہ سکتا ہے۔ شملہ، کلو، منڈی، سولن اور سرمور اضلاع میں بھاری بارش، ژالہ باری اور 40 سے 50 کلومیٹر فی گھنٹہ کی رفتار سے تیز ہوائیں چلنے کا اورینج الرٹ جاری کیا گیا ہے۔ دیگر علاقوں کے لیے یلو الرٹ نافذ ہے۔ محکمہ کا اندازہ ہے کہ 7 مئی تک ریاست میں وقفے وقفے سے بارش کا سلسلہ جاری رہ سکتا ہے، جبکہ اونچائی والے علاقوں میں ہلکی برف باری بھی ممکن ہے۔

خراب موسم کا اثر عام زندگی اور زراعت دونوں پر پڑ رہا ہے۔ نشیبی علاقوں میں اس وقت گیہوں کی کٹائی کا کام چل رہا ہے، لیکن بارش کی وجہ سے فصل بھیگنے سے نقصان کا خدشہ بڑھ گیا ہے۔ کسان خاصے فکر مند ہیں کیونکہ یہ وقت فصل کو محفوظ گھر لانے کا ہوتا ہے۔ اس دوران، حال ہی میں کلو ضلع کے آنی علاقے میں آندھی کی وجہ سے ایک درخت چلتی گاڑی پر گر گیا تھا، جس میں چار معلمات کی موت ہو گئی تھی۔ محکمہ موسمیات نے لوگوں سے اپیل کی ہے کہ وہ خراب موسم کے دوران غیر ضروری سفر سے بچیں، محفوظ مقامات پر رہیں اور خاص طور پر پہاڑی علاقوں میں محتاط رہیں۔

ہندوستھان سماچار

---------

ہندوستان سماچار / انظر حسن