ممبئی ، 25 مئی (ہ س) ۔ مہاراشٹر کے ضلع بلڈھانہ میں پیر کی صبح ایک انتہائی افسوسناک اور دل دہلا دینے والا واقعہ پیش آیا، جہاں بیوی سے تنازعے کے بعد ایک شخص نے اپنے چار کمسن بچوں کو کنویں میں پھینک کر ہلاک کر دیا اور بعد میں خود بھی پھانسی لگا کر خودکشی کر لی۔ جمود دیہی پولیس اسٹیشن نے پانچوں لاشیں برآمد کر کے پوسٹ مارٹم کے لیے روانہ کر دی ہیں۔ اس واقعے کے بعد پورے علاقے میں سنسنی اور خوف کی فضا پھیل گئی ہے۔پولیس کے مطابق خودکشی کرنے والے شخص کی شناخت وجئے موسیٰ کیراڈیا (35) کے طور پر ہوئی ہے۔ وجئے اپنے اہل خانہ کے ساتھ جمود تعلقہ کے راجورہ علاقے کے بھالے انجن گاؤں میں رہتا تھا۔ پولیس نے بتایا کہ وجئے کا اپنی بیوی رینا کیراڈیا کے ساتھ اکثر جھگڑا رہتا تھا۔ اسی تنازعے کے سبب اتوار کے روز وہ اپنی بیوی کو اس کے میکے چھوڑ کر آیا تھا۔تحقیقات کے مطابق پیر کی صبح وجئے گھر کے کام کاج میں مصروف تھا، اسی دوران کسی شخص نے اس سے پوچھ لیا کہ اس کی بیوی کہاں ہے، جس کی وجہ سے اسے گھر کا کام کرنا پڑ رہا ہے۔ بتایا جا رہا ہے کہ اس بات سے وجئے شدید ذہنی دباؤ میں آ گیا۔ اس کے بعد وہ اپنے چاروں بچوں کو ساتھ لے کر راجورہ علاقے کے ایک کنویں تک پہنچا اور مبینہ طور پر انہیں ایک ایک کر کے کنویں میں پھینک دیا۔ بچوں کو کنویں میں دھکیلنے کے بعد وجئے نے ایک درخت سے لٹک کر خود بھی خودکشی کرلی۔واقعے کی اطلاع ملتے ہی جمود پولیس فوری طور پر موقع پر پہنچی اور پانچوں لاشیں برآمد کر کے پوسٹ مارٹم کے لیے اسپتال روانہ کر دیں۔ پولیس کے ساتھ فورینسک ٹیم بھی موقع پر پہنچ گئی اور شواہد جمع کیے گئے۔ اس واقعے میں ہلاک ہونے والے بچوں کی شناخت پریت وجئے کیراڈیا (7)، پراچی وجئے کیراڈیا (5)، پوروی وجئے کیراڈیا (4) اور دو سالہ پیوش وجئے کیراڈیا کے طور پر ہوئی ہے۔پولیس اس افسوسناک واقعے کی مختلف زاویوں سے مزید تحقیقات کر رہی ہے۔ہندوستھان سماچار
--------------------
ہندوستان سماچار / جاوید این اے
