کیئف،23مئی (ہ س)۔جرمن چانسلر کی جانب سے چند روز قبل پیش کی گئی تجویز کے جواب میں یوکرین کے صدر وولودیمیر زیلنسکی نے یورپی یونین کے رہنماو¿ں کو ایک خط ارسال کیا ،جس میں انہوں نے مکمل رکنیت کا مطالبہ کیا۔زیلنسکی نے اپنے خط میں واضح کیا کہ یوکرین یورپی یونین میں صرف ''وابستہ رکن'' کے طور پر شامل ہونے کو قبول نہیں کرے گا، خاص طور پر اس صورت میں جب اسے ووٹ دینے کا حق حاصل نہ ہو، جیسا کہ خبر رساں ادارے رائٹرز نے ہفتے کے روز رپورٹ کیا۔

انہوں نے مزید کہا کہ اب وقت آ گیا ہے کہ ان کا ملک مکمل اور فعال رکنیت حاصل کرے اور ان کے مطابق یہ انصاف کے خلاف ہے کہ یوکرین یورپی یونین کا حصہ ہو مگر اس کی کوئی رائے یا ووٹ نہ ہو۔انہوں نے مزید کہا: ہم مکمل طور پر سمجھتے ہیں کہ یورپی یونین میں شمولیت ایک دن میں ممکن نہیں ہوتی، لیکن ممالک کو انضمام کے لیے درکار وقت دیا جا سکتا ہے، اس دوران ان کے حقوق محدود نہیں ہونے چاہئیں۔

زیلنسکی نے زور دیا کہ اب وقت آ گیا ہے کہ یوکرین کی یورپی یونین میں مکمل اور بامعنی شمولیت کے عمل کو آگے بڑھایا جائے، خاص طور پر ہنگری میں انتخابات کے بعد اس سمت میں پیش رفت ضروری ہے۔یہ خط اس وقت سامنے آیا جب جرمن چانسلر فریڈرِش مرٹس نے یوکرین کو یورپی یونین کے ڈھانچے میں براہِ راست کردار دینے کی تجویز پیش کی، تاکہ یہ ایک عبوری مرحلہ ہو جو بعد میں مکمل رکنیت کی طرف لے جائے۔ان کا کہنا تھا کہ یہ قدم روس-یوکرین جنگ کے خاتمے کے لیے کسی معاہدے تک پہنچنے کے عمل کو تیز کر سکتا ہے۔

انہوں نے یوکرین کے لیے ایک نیا درجہ ''وابستہ رکن'' (associate member) متعارف کرانے کی بھی تجویز دی، جس کے تحت یوکرینی حکام یورپی یونین کے سربراہی اجلاسوں اور وزارتی ملاقاتوں میں شرکت کر سکیں گے، لیکن انہیں ووٹ کا حق حاصل نہیں ہو گا۔انہوں نے یہ بھی تجویز دی کہ یورپی یونین کے اراکین سیاسی طور پر اس بات کے پابند ہوں کہ یوکرین پر باہمی مدد کی شق کو نافذ کریں، تاکہ اسے ایک بنیادی سیکیورٹی ضمانت فراہم کی جا سکے۔کیف سے یہ تجویز ایک درمیانی راستہ تلاش کرنے کی کوشش ہے، جو تیز رفتار شمولیت کے آپشن اور یوکرین کی موجودہ صورتحال کے درمیان ہے، کیونکہ وہ اب بھی رکنیت کے ابتدائی مراحل میں ایک امیدوار ملک ہے۔

یاد رہے کہ یورپی یونین میں شمولیت کے خواہش مند ممالک کے لیے سخت شرائط رکھی جاتی ہیں، جن میں مستحکم جمہوری نظام، انسانی حقوق اور قانون کی بالادستی کا احترام، یورپی منڈی میں مقابلہ کرنے کی صلاحیت رکھنے والی معیشت، اور بدعنوانی کے خلاف مو¿ثر اقدامات شامل ہیں۔گزشتہ برسوں میں کیف میں بدعنوانی کی سطح نسبتاً زیادہ رہی ہے اور روسی حملے کے بعد بھی کئی بدعنوانی کے اسکینڈلز سامنے آئے ہیں، جن میں بعض الزامات زیلنسکی کے قریبی حلقوں تک بھی پہنچے۔اس کے علاوہ جنگ کے باعث ملک میں کئی برسوں سے انتخابات نہیں ہوئے، حالانکہ صدر اور پارلیمنٹ کی مدتِ صدارت مکمل ہو چکی ہے، لیکن فروری 2022 سے جاری جنگ کی وجہ سے انتخابات منعقد نہیں ہو سکے۔

ہندوستھان سماچار

ہندوستان سماچار / Mohammad Khan