تاریخ کے اوراق میں 18 مئی کا دن ہندوستان کی سائنسی اور تزویراتی (اسٹریٹجک) صلاحیت کے استعارے کے طور پر درج ہے۔ سال 1974 میں اسی دن ہندوستان نے راجستھان کے پوکھرن میں اپنا پہلا کامیاب زیرِ زمین ایٹمی تجربہ کر کے دنیا کو اپنی تکنیکی صلاحیت سے روشناس کرایا تھا۔ اس کامیابی نے ہندوستان کو ایٹمی صلاحیت رکھنے والے ملکوں کی صفِ اول میں لا کھڑا کیا۔

یہ تجربہ ’’اسائلنگ بدھا‘‘ کے نام سے جانا گیا۔ اس کی خاص بات یہ تھی کہ اس وقت اقوامِ متحدہ کی سلامتی کونسل کے پانچ مستقل رکن ملکوں کے علاوہ کسی دوسرے ملک نے اس سطح کا ایٹمی تجربہ نہیں کیا تھا۔ ہندوستان کے اس قدم کو سائنسی خود انحصاری اور قومی سلامتی کی سمت میں ایک اہم کامیابی مانا گیا۔

اس ایٹمی پروگرام کی بنیاد سال 1972 میں رکھی گئی تھی۔ اس وقت کی وزیراعظم اندرا گاندھی نے بھابھا اٹامک ریسرچ سینٹر (بارک) کا دورہ کیا تھا۔ اسی دوران سائنسدانوں کے ساتھ گفتگو میں ایٹمی تجربے کے منصوبے کو آگے بڑھانے پر اتفاق رائے ہوا تھا۔ اس کے بعد ہندوستانی سائنسدانوں نے بیحد خفیہ طریقے سے اس پروجیکٹ پر کام شروع کیا۔

راجستھان کے پوکھرن میں کیے گئے اس تجربے نے دنیا کی توجہ ہندوستان کی طرف مبذول کرائی۔ اس دور میں یہ محض ایک سائنسی کامیابی نہیں تھی، بلکہ اس سے ہندوستان کی تزویراتی حیثیت بھی مضبوط ہوئی۔ اگرچہ اس تجربے کے بعد بین الاقوامی سطح پر کئی ردِعمل بھی سامنے آئے اور ہندوستان کو کچھ تکنیکی و سفارتی چیلنجوں کا سامنا کرنا پڑا۔

اس کے باوجود یہ کامیابی ہندوستانی سائنس کی تاریخ میں سنگِ میل ثابت ہوئی۔ بعد میں سال 1998 میں ہندوستان نے پوکھرن میں ہی ایک اور سلسلے کے ایٹمی تجربات کر کے اپنی صلاحیت کو مزید مضبوطی سے دنیا کے سامنے رکھا۔ 18 مئی آج بھی ہندوستان کی سائنسی بصیرت، خود انحصاری اور قومی طاقت کی علامت کے طور پر یاد کیا جاتا ہے۔

دیگر اہم واقعات:

1848 - جرمنی میں پہلی نیشنل اسمبلی کا افتتاح ہوا۔

1912 - پہلی ہندوستانی فیچر لینتھ فلم ’’شری پنڈالک‘‘ ریلیز ہوئی۔

1950 - شمالی اوقیانوسی معاہدے (نیٹو) پر دستخط کرنے کے ایک سال بعد اسی دن دنیا کے 12 ملکوں نے امریکہ اور یورپ کے دفاع کے لیے ایک مستقل تنظیم پر اتفاق کیا تھا۔

1991 - چاکلیٹ کمپنی میں کیمسٹ کے طور پر کام کرنے والی 27 سالہ ہیلن نے برطانیہ کی پہلی خلا نورد کے طور پر سوویت سویوز طیارے سے اڑان بھری۔ انہیں ایک پہیلی کا جواب دینے پر یہ موقع دیا گیا تھا۔

1994 - اقوامِ متحدہ نے 1995 کو ’’اقوامِ متحدہ سالِ رواداری‘‘ کے طور پر منانے کا فیصلہ کیا۔

1994 - غزہ پٹی کے علاقے سے آخری اسرائیلی فوجی دستہ ہٹائے جانے کے ساتھ ہی علاقے پر فلسطینی خود مختار انتظامیہ مکمل طور پر نافذ ہو گئی۔

2004 - اسرائیل کے رفح پناہ گزین کیمپ میں اسرائیلی فوجیوں نے 19 فلسطینیوں کو موت کے گھاٹ اتار دیا۔

2006 - نیپال کے بادشاہ کو ٹیکس کے دائرے میں لایا گیا۔

2007 - قازقستان کے صدر نور سلطان نذر بائیوف کی مدتِ کار غیر معینہ مدت کے لیے بڑھا دی گئی۔

2008 - پسِ پردہ گلوکار نتن مکیش کو مدھیہ پردیش حکومت نے قومی لتا منگیشکر ایوارڈ سے نوازا۔

2008 - ہندوستانی نژاد مصنف اندرا سنہا کو ان کی کتاب ’’اینیمل پیپل‘‘ کے لیے کامن ویلتھ اعزاز فراہم کیا گیا۔

2009 - سری لنکا حکومت نے 25 سال سے تمل باغیوں کے ساتھ ہو رہی جنگ کے خاتمے کا اعلان کیا۔ فوج نے ملک کے شمالی حصے پر قبضہ کیا اور ایل ٹی ٹی ای سربراہ ویلوپلئی پربھاکرن کو ہلاک کر دیا۔

ہندوستھان سماچار

---------------

ہندوستان سماچار / انظر حسن