کولکاتا، 15 مئی (ہ س)۔ مغربی بنگال حکومت نے آر جی کر میڈیکل کالج میں ایک خاتون ڈاکٹر کی عصمت دری اور قتل معاملہ میں بڑی انتظامی کارروائی کرتے ہوئے تین آئی پی ایس افسران کو معطل کر دیا ہے۔ وزیراعلیٰ شبھیندو ادھیکاری نے جمعہ کو نبنا میں اس کا اعلان کیا۔ انہوں نے کہا کہ کیس فائل کو دوبارہ کھولا جائے گا اور اس وقت کے انچارج افسران کے خلاف محکمانہ انکوائری شروع کی جائے گی۔

معطل کیے گئے افسران میں کولکاتا کے سابق پولیس کمشنر ونیت گوئل، اس وقت کے ڈپٹی کمشنر آف پولیس (سنٹرل) اندرا مکوپادھیائے اور اس وقت کے ڈپٹی کمشنر آف پولیس (نارتھ) ابھیشیک گپتا شامل ہیں۔ وزیر اعلیٰ نے کہا کہ ان افسران پر ڈیوٹی میں لاپرواہی اور معاملہ کو غلط انداز میں چلانے کا الزام ہے۔

وزیر اعلی شبھیندو ادھیکاری نے کہا کہ وزیر داخلہ کا عہدہ سنبھالنے کے بعد، انہوں نے آر جی کر معاملہ اور متعلقہ واقعات پر چیف سکریٹری اور ہوم سکریٹری سے تفصیلی رپورٹ طلب کی تھی۔ انہوں نے مزید کہا کہ حکومت نے یہ انتظامی فیصلہ معلومات اور حقائق کا جائزہ لینے کے بعد کیا ہے۔

وزیر اعلیٰ نے الزام لگایا کہ ایف آئی آر کے اندراج اور مقدمے کی ابتدائی کارروائی میں سنگین بے ضابطگیاں کی گئی ہیں۔ انہوں نے کہا کہ مختلف میڈیا آوٹ لیٹس نے یہ بھی رپورٹ کیا تھا کہ متاثرہ کی ماں کو ریاستی حکومت کی طرف سے رقم ادا کرنے کی کوشش کی گئی تھی۔ ان الزامات کی بھی تحقیقات کی جائیں گی۔

قابل ذکر ہے کہ ونیت گوئل اگست 2024 میں آر جی کر میڈیکل کالج کی ایک خاتون ڈاکٹر کی عصمت دری اور قتل کے وقت کولکاتا کے پولیس کمشنر تھے، انہیں ستمبر 2024 میں عہدے سے ہٹا دیا گیا تھا اور اس واقعے کے بعد بڑے پیمانے پر احتجاج اور جونیئر ڈاکٹروں کی تحریک کے درمیان انہیں اسپیشل ٹاسک فورس میں ٹرانسفرکیا گیا تھا۔

اس دوران آئی پی ایس افسر ابھیشیک گپتا کو بھی تحقیقات میں لاپرواہی کے الزامات کے بعد ان کے عہدے سے ہٹا دیا گیا۔ آئی پی ایس افسر اندرا مکوپادھیائے اس وقت کولکاتا پولیس کے سنٹرل ڈویژن کی انچارج تھیں اور اس واقعے کے بعد سے کئی بار عوامی طور پر پولیس کا دفاع کر چکی ہیں۔

---------------

ہندوستان سماچار / عبدالسلام صدیقی