سمراٹ وکرمادتیہ بین الاقوامی اعزاز گڈ گورننس، ثقافتی تحفظ اور عالمی انسانی بہبود کے شعبے میں نمایاں کارکردگی دکھانے والوں کو اعزاز سے نوازا جائے گا

بھوپال، 15 مئی (ہ س)۔

مدھیہ پردیش حکومت نے سمراٹ وکرمادتیہ کی شاندار یاد میں ’’سمراٹ وکرمادتیہ بین الاقوامی اعزاز‘‘ قائم کیا ہے۔ اس اعزاز کے لیے ریاستی حکومت کی جانب سے نامزدگیاں طلب کی گئی ہیں۔

مہاراجہ وکرمادتیہ شودھ پیٹھ کے ڈائریکٹر شری رام تیواری نے جمعہ کو بتایا کہ وزیراعلیٰ ڈاکٹر موہن یادو کی پہل پر یہ اعزاز دینے کا فیصلہ کیا گیا ہے۔ انہوں نے بتایا کہ یہ سمراٹ وکرمادتیہ کی بہادری، انصاف پسندی، گڈ گورننس، سخاوت، رعایا پروری اور ہندوستانی ثقافتی اقدار کو عالمی سطح پر باوقار بنانے کی سمت میں ایک اہم پیش رفت ہے۔ مہاراجہ وکرمادتیہ شودھ پیٹھ، اجین کی جانب سے محکمہ ثقافت کے تعاون سے قائم کردہ سمراٹ وکرمادتیہ بین الاقوامی اعزاز کی رقم ایک کروڑ ایک لاکھ روپے مقرر کی گئی ہے۔ اس کے ساتھ ہی 21 لاکھ روپے کا قومی اعزاز اور پانچ پانچ لاکھ روپے کے تین شیکھر اعزازات بھی قائم کیے گئے ہیں۔ یہ اعزاز ہندوستان کے ثقافتی وقار کو عالمی اسٹیج پر ایک نئی پہچان فراہم کرے گا۔ دلچسپی رکھنے والے ادارے اور افراد 20 مئی 2026 تک اعزاز کے لیے نامزدگیاں بھر سکتے ہیں۔

انہوں نے بتایا کہ اعزاز کے لیے درخواست اور نامزدگی کا عمل شودھ پیٹھ کی سرکاری ویب سائٹ https://awards.mvspujjain.com پر شروع کر دیا گیا ہے۔ ویب سائٹ پر اعزاز سے متعلق رہنما خطوط، اہلیت، انتخاب کا طریقہ کار اور مختلف زمروں کی تفصیلی معلومات فراہم کی گئی ہیں۔ بین الاقوامی اعزاز، قومی اعزاز اور شیکھر اعزاز کے لیے ایک ’’اسپیڈ ریڈ‘‘ خلاصہ بھی دستیاب ہے، جس میں ہر انعام کی اہلیت کا ذکر کیا گیا ہے۔

شری رام تیواری کے مطابق، سمراٹ وکرمادتیہ بین الاقوامی اعزاز عالمی سطح پر سرگرم ان ممتاز شخصیات اور اداروں کو دیا جائے گا جنہوں نے سمراٹ وکرمادتیہ کے آئیڈیلز جیسے گڈ گورننس، انصاف پسندی، حکمت، سخاوت، ثقافت سے محبت، سائنسی فہم اور عوامی بہبود کو اپنے کاموں کے ذریعے زندہ جاوید شکل میں پیش کیا ہو۔ اس اعزاز کی رقم ایک کروڑ ایک لاکھ روپے مقرر کی گئی ہے۔ اعزاز کے لیے انصاف، سخاوت، گڈ گورننس، فلکیات اور علمِ نجوم، فن، بہادری، سفارت کاری، روحانیت، عالمی انسانی بہبود، سماجی ترقی، بین الاقوامی بھائی چارہ، ہندوستانی ثقافت کے عروج، سماجی اختراع، ہندوستانی فلسفہ اور ویدانت کی تشہیر سمیت عوامی بہبود کے کاموں کے شعبے میں نمایاں خدمات انجام دینے والے ہندوستان سمیت دنیا بھر کے افراد یا ادارے درخواست دے سکتے ہیں۔

انہوں نے بتایا کہ قومی سطح پر بہترین کام کرنے والے افراد اور اداروں کو 21 لاکھ روپے کی رقم کے قومی اعزاز سے نوازا جائے گا۔ یہ اعزاز انصاف، سخاوت، بہادری، گڈ گورننس، فلکیات اور علمِ نجوم، فن، سفارت کاری، روحانی شعبہ اور تخلیقی و عوامی بہبود کے کاموں میں نمایاں خدمات کے لیے دیا جائے گا۔

تیواری نے بتایا کہ ان انعامات کے علاوہ پانچ پانچ لاکھ روپے کے تین شیکھر اعزازات بھی قائم کیے گئے ہیں۔ یہ اعزاز سمراٹ وکرمادتیہ کی گوناگوں خوبیوں جیسے قانونِ انصاف، فلکیات اور علمِ نجوم، فن، بہادری، قدیم ادب، سفارت کاری، روحانی شعبہ اور تخلیقی عوامی بہبود کے کاموں میں مخصوص خدمات انجام دینے والے ہندوستان کے سرگرم افراد یا اداروں کو دیے جائیں گے۔

انہوں نے بتایا کہ یہ اعزاز دورِ نو کی تعمیر، عالمی انسانی بہبود، سماجی ترقی، بین الاقوامی بھائی چارہ، بین المذاہب ہم آہنگی، ہندوستانی ثقافت کے عروج، سماجی اختراع، ہندوستانی فلسفہ، مذہب، انصاف، روایت اور ویدانت کی تشہیر میں نمایاں خدمات انجام دینے والے جفاکش افراد یا اداروں کو دیا جائے گا۔ اعزاز کے لیے ملک و بیرونِ ملک کے افراد، اداروں، ماہرینِ عمرانیات، دانشوروں، مصنفین، مبصرین، صحافیوں اور مختلف شعبوں کے ماہرین سے نامزدگیاں اور سفارشات طلب کی گئی ہیں۔

تیواری کے مطابق، اعزاز کے انتخاب کے لیے ہر سال اعلیٰ سطح کی سلیکشن کمیٹی تشکیل دی جائے گی۔ سلیکشن کمیٹی میں وزیراعلیٰ بطور چیئرمین اور مرکزی وزیرِ ثقافت اور چیف سکریٹری، مدھیہ پردیش بطور مستقل ممبر شامل رہیں گے۔ اس کے علاوہ سماجی کارکنوں، دانشوروں، ماہرینِ عمرانیات، مصنفین، صحافیوں، صنعت کاروں، قانون دانوں، ماہرینِ آثارِ قدیمہ، ڈاکٹروں اور ماہرین کو بھی شامل کیا جائے گا۔

انتخاب کے عمل میں متعلقہ شعبے میں اعلیٰ درجے کی تخلیقی صلاحیت، مخصوص کامیابی، مسلسل محنت اور خدمات کو بنیاد بنایا جائے گا۔ انتخاب کے وقت متعلقہ شخص یا ادارے کا سرگرم اور مستقل کام کرنا لازمی ہوگا۔ سلیکشن کمیٹی کے سامنے پیش کی گئی سفارشات کے علاوہ بورڈ اپنی صوابدید سے دیگر ناموں پر بھی غور کر سکے گا۔

ایک بار اعزاز حاصل کرنے والے شخص یا ادارے کو دوبارہ یہ اعزاز نہیں دیا جائے گا۔ سلیکشن کمیٹی کی طرف سے متفقہ طور پر کی گئی سفارش ریاستی حکومت کو بھیجی جائے گی اور حکومت کی منظوری کے بعد ہی اعزاز کا باقاعدہ اعلان کیا جائے گا۔

ہندوستھان سماچار

---------------

ہندوستان سماچار / انظر حسن