ٹوکیو/ناگویا، 09 اپریل (ہ س)۔ انٹرنیشنل کرکٹ کونسل (آئی سی سی) نے اعلان کیا ہے کہ ایشین گیمز کے لیے جاپان میں بنائے گئے نئے کرکٹ اسٹیڈیم میں اگلے ماہ پہلی بار مردوں کے ٹی ٹوئنٹی انٹرنیشنل میچز کھیلے جائیں گے۔

جاپان، جو کہ بیس بال کے لیے مشہور ملک ہے، اس سال 2026 کے ایشین گیمس کی میزبانی کر رہا ہے، جو 19 ستمبر سے 4 اکتوبر تک ناگویا اور ایچی کے علاقوں میں ہونے والے ہیں۔ اس ایونٹ کے لیے خاص طور پر تیار کیا گیا نیا کرکٹ گراو¿نڈ اب اپنا بین الاقوامی آغاز کرنے کے لیے تیار ہے۔

ناگویا کے قریب نیشین میں واقع یہ اسٹیڈیم 8 مئی سے 18 مئی کے درمیان 2028 مینس ٹی20 ورلڈ کپ کے لیے ایسٹ ایشیا پیسیفک کوالیفائرز کی میزبانی کرے گا۔ یہ اب تک کا سب سے بڑا ایسٹ ایشیا پیسیفک کوالیفائنگ ٹورنامنٹ ہوگا، جس میں نو ٹیموں کی شرکت ہوگی۔

اس ٹورنامنٹ کے ذریعے، ٹیمیں آسٹریلیا اور نیوزی لینڈ میں منعقد ہونے والے ٹی20 ورلڈ کپ میں جگہ کے لیے اپنی بولی کو مضبوط کرنے کی کوشش کریں گی۔ کچھ میچ ٹوکیو سے تقریباً 100 کلومیٹر دور سانو میں واقع جاپان کرکٹ ایسوسی ایشن کے ہیڈ کوارٹر میں بھی کھیلے جائیں گے۔

جاپان کرکٹ ایسوسی ایشن کے چیف آپریٹنگ آفیسر ایلن کر نے کہا کہ یہ جاپان کے لیے متعدد مقامات پر بین الاقوامی ٹورنامنٹس کی میزبانی کرنے کی اپنی صلاحیت کا مظاہرہ کرنے کا ایک اہم موقع ہے۔ انہوں نے اس یقین کا اظہار کیا کہ یہ ایونٹ نہ صرف ای اے پی خطے کی بہترین ٹیموں کو ایک پلیٹ فارم فراہم کرے گا بلکہ ایشین گیمز سے قبل کرکٹ کے لیے جوش و خروش بھی پیدا کرے گا۔

ان کوالیفائرز میں میزبان ملک جاپان کے علاوہ کوک آئی لینڈ، فجی، انڈونیشیا، پاپوا نیو گنی، فلپائن، جنوبی کوریا، ساموا اور وانواتو کی ٹیمیں شرکت کریں گی۔

---------------

ہندوستان سماچار / عبدالسلام صدیقی