نئی دہلی، 30 اپریل (ہ س):۔

ملک میں باسمتی چاول کے ماحولیاتی نظام کو مضبوط بنانے کے لیے پیلی بھیت میں باسمتی اور آرگینک ٹریننگ سینٹر کھولا جائے گا۔ اس مقصد کے لیے، زرعی اور پراسیسڈ فوڈ پروڈکٹس ایکسپورٹ ڈیولپمنٹ اتھارٹی (اے پی ای ڈی اے) نے اتر پردیش حکومت کے ساتھ 70 سال کے لیز کے معاہدے پر دستخط کیے ہیں۔ ٹانڈہ بیجاسی، پیلی بھیت میں باسمتی اور آرگینک ٹریننگ سینٹر-کم-ڈیمونسٹریشن فارم کے قیام کے لیے زمین کی منتقلی کا باقاعدہ آغاز کر دیا گیا ہے۔

وزارت تجارت اور صنعت کے مطابق مجوزہ باسمتی اور آرگینک ٹریننگ سینٹر کم ڈیموسٹریشن فارم تقریباً سات ایکڑ رقبے پر تیار کیا جائے گا۔ اس سینٹر میں ایک آڈیٹوریم، ایک میوزیم اور باسمتی اور نامیاتی کاشتکاری سے متعلق گیلری، ایک کانفرنس روم، ایک لیبارٹری، اور آرگینک کاشتکاری کے لیے درکار مواد کو ذخیرہ کرنے کی سہولیات شامل ہوں گی۔ یہ سہولت باسمتی اور نامیاتی کاشتکاروں کی تربیت اور صلاحیت بڑھانے میں سہولت فراہم کرے گی اور یہ زرعی ماہرین اور طلباء کے لیے وسائل کے مرکز کے طور پر بھی کام کرے گی۔

تجارت اور صنعت کے مرکزی وزیر مملکت جتن پرساد نے اس پہل کی تعریف کی اور پیلی بھیت کو باسمتی چاول پیدا کرنے والے ایک بڑے خطے کے طور پر ترقی دینے کی بے پناہ صلاحیت کو اجاگر کیا۔ پرساد نے ہندوستان کے پہلے اے آئی پر مبنی باسمتی چاول سروے پروجیکٹ (2026-2028) کی بھی نقاب کشائی کی، جسےاے پی ای ڈی اے کے ذریعہ آل انڈیا رائس ایکسپورٹرز ایسوسی ایشن (اے آر آئی ای اے) کے تعاون سے لاگو کیا جائے گا۔

وزارت نے کہا کہ یہ منصوبہ تقریباً 4 ملین ہیکٹر کا احاطہ کرے گا، 150,000 سے زیادہ زمینی سطح کے سروے پوائنٹس سے ڈیٹا اکٹھا کرے گا، اور 500,000 سے زیادہ کسانوں کے ساتھ منسلک ہوگا۔ اس کا مقصد فصلوں کی درست تشخیص، مختلف قسم کی شناخت، سائنسی مشاورتی خدمات، اور بہتر برآمدی منصوبہ بندی کی حمایت کرنا ہے۔

اس تقریب میں تجارت و صنعت اور الیکٹرانکس اور انفارمیشن ٹکنالوجی کے وزیر مملکت جتن پرساد، ضلع کے سینئر عوامی نمائندے، اے پی ای ڈی اے کے افسران، اتر پردیش حکومت اور دیگر اسٹیک ہولڈرز نے شرکت کی۔

ہندوستھان سماچار

ہندوستان سماچار / عطاءاللہ