جموں, 25 اپریل (ہ س)۔ جموں و کشمیر کے لیفٹیننٹ گورنر منوج سنہا نے ہفتہ کے روز ’نشہ مکت ابھیان‘ کے تحت جاری 100 روزہ مہم کے سلسلے میں ضلع سانبہ کے ضلعی ہیڈکوارٹر پہنچے، جہاں انہوں نے کہا کہ منشیات کے خاتمے میں نوجوان کلیدی کردار ادا کر سکتے ہیں۔

سانبہ میں اس موقع پر ایک بڑا عوامی اجتماع منعقد ہوا، جس میں مختلف شعبہ ہائے زندگی سے تعلق رکھنے والے افراد نے شرکت کی اور معاشرے کو منشیات سے پاک بنانے کے عزم کا اعادہ کیا۔

اجتماع سے خطاب کرتے ہوئے لیفٹیننٹ گورنر نے کہا کہ یہ 100 روزہ تحریک آنے والی نسلوں کے لیے ایک مثال قائم کرے گی اور اس بات کا ثبوت بنے گی کہ جب عوام متحد ہو جائیں تو وہ تاریخ کا رخ بدل سکتے ہیں۔

انہوں نے یاد دلایا کہ 11 اپریل کو جموں کے ایم اے اسٹیڈیم سے پریڈ گراؤنڈ تک پدیاترا کے ذریعے اس مہم کا آغاز کیا گیا تھا، جس کے بعد مختلف اضلاع میں ریلیاں نکالی گئیں۔

نوجوانوں کو مخاطب کرتے ہوئے انہوں نے کہا کہ اس سنگین مسئلے کا حل انہی کے ہاتھ میں ہے۔ ان کے مطابق نوجوانوں کے خواب مضبوط اور صلاحیتیں بے پناہ ہیں، لہٰذا معاشرے کو چاہیے کہ وہ ان کی بھرپور حمایت کرے تاکہ وہ درست راستے پر گامزن رہیں۔

دریں اثنا، گزشتہ دو ہفتوں کے دوران جموں و کشمیر بھر میں منشیات کے خلاف بڑے پیمانے پر کریک ڈاؤن کیا گیا، جس میں متعدد منشیات فروشوں، بشمول سرغناؤں کو گرفتار کیا گیا، جبکہ منشیات کی اسمگلنگ سے جڑی کئی رہائشی جائیدادوں کو بھی منہدم کیا گیا۔

ہندوستھان سماچار

---------------

ہندوستان سماچار / محمد اصغر