امریا، 25 اپریل (ہ س)۔

مدھیہ پردیش کے ضلع امریا میں نیشنل ہائی وے 43 پر گرام امہا کھیردائی مندر کے پاس جمعہ اور ہفتہ کی درمیانی شب ایک سڑک حادثے میں زخمی ہونے والے دو چچازاد بھائیوں کی علاج کے دوران موت ہو گئی، جبکہ دو کو تشویشناک حالت میں شہڈول میڈیکل کالج ریفر کیا گیا ہے۔

واقعے کے بارے میں 108 ایمبولینس کے ای ایم ٹی عابد شیخ نے بتایا کہ دیر رات اطلاع ملی کہ امہا کھیردائی کے پاس سڑک حادثہ ہو گیا ہے۔ اطلاع ملتے ہی فوری طور پر موقع پر پہنچے تو وہاں چار نوجوان تشویشناک حالت میں پڑے ہوئے تھے۔ تمام کو ضلع اسپتال لایا گیا، جہاں علاج کے دوران دو نوجوانوں کی موت ہو گئی۔ ہلاک شدگان میں تھانہ نوروز آباد کے تحت گرام برہی کے ساکن سنن (18) ولد سکھ رام بیگا اور ابھیشیک (20) ولد بابو لال بیگا شامل ہیں۔ دونوں متوفیان چچازاد بھائی تھے۔ وہیں شیوم (10) ولد دادو رام بیگا اور چھوٹو (26) ولد آشا رام بیگا ساکن گرام کنچن پور، تھانہ نوروز آباد شدید زخمی ہیں، جنہیں ضلع اسپتال میں ابتدائی طبی امداد کے بعد شہڈول ریفر کیا گیا ہے۔

متوفین کے لواحقین نے بتایا کہ تمام نوجوان شادی کی ایک تقریب میں شرکت کے لیے گرام کرن تال جا رہے تھے، اسی دوران گرام امہا میں واقع کھیر ماتا مندر کے پاس سڑک کنارے کھڑے ٹرک نمبر (سی جی 04 ایم آر 4838) سے ٹکرا کر حادثے کا شکار ہو گئے۔ وہاں موجود لوگوں نے بتایا کہ یہ ٹرک خراب ہونے کی وجہ سے یہاں کھڑا تھا اور بائیک پر سوار یہ نوجوان تیز رفتاری سے آ کر ٹرک میں گھس گئے، جس کی وجہ سے یہ لوگ حادثے کا شکار ہوئے ہیں۔

ہندوستھان سماچار

---------------

ہندوستان سماچار / انظر حسن