جموں, 25 اپریل (ہ س)۔

جموں و کشمیر وقف بورڈ کی چئیرپرسن ڈاکٹر درخشان اندرابی نے ڈوڈہ میں وقف زمین پر تعمیر شدہ ایک جدید کھیل اور سیر و تفریح کے میدان کا افتتاح کیا۔ اس موقع پر وقف بورڈ کے عہدیداران، مقامی معززین اور شہریوں کی بڑی تعداد موجود رہی۔تقریب کے دوران ڈاکٹر اندرابی نے ٹرف سے تیار کردہ میدان کا معائنہ کیا اور منصوبے کی تکمیل پر اطمینان کا اظہار کیا۔ انہوں نے کہا کہ سال 2023 میں جب وہ پہلی بار بطور چئیرپرسن ڈوڈہ آئی تھیں تو یہ جگہ گندگی کے ڈھیر میں تبدیل تھی اور یہاں سے گزرنا بھی مشکل تھا، تاہم وقف بورڈ کی مسلسل کاوشوں کے نتیجے میں آج یہ مقام ایک خوبصورت اور دلکش منظر پیش کر رہا ہے۔میڈیا سے گفتگو کرتے ہوئے انہوں نے کہا کہ یہ میدان نوجوانوں، بچوں اور بزرگوں کے لیے تیار کیا گیا ہے تاکہ وہ یہاں کھیل کود اور تفریح کے ذریعے صحت مند سرگرمیوں میں حصہ لے سکیں۔ انہوں نے نوجوانوں پر زور دیا کہ وہ منشیات جیسی برائیوں سے دور رہیں اور کھیلوں کی طرف راغب ہوں۔

ڈاکٹر درخشان اندرابی نے اس عزم کا بھی اعادہ کیا کہ وقف کی تمام املاک اور زمینوں کو غیر قانونی قبضوں سے آزاد کرا کر عوامی فلاح و بہبود کے لیے استعمال میں لایا جائے گا۔

ہندوستھان سماچار

---------------

ہندوستان سماچار / محمد اصغر