نئی دہلی، 25 اپریل (ہ س)۔ انڈین پریمیئر لیگ (آئی پی ایل) 2026 میں رائل چیلنجرز بنگلورو کی گجرات ٹائٹنز پر پانچ وکٹوں سے جیت کے بعد اورینج کیپ کی دوڑ میں بڑی تبدیلی دیکھنے کو ملی ہے۔ اس مقابلے میں شاندار کارکردگی کے دم پر وراٹ کوہلی ایک بار پھر ٹاپ پوزیشن پر پہنچ گئے ہیں۔
206 رن کے ہدف کا پیچھا کرتے ہوئے کوہلی نے اوپننگ کرتے ہوئے 44 گیندوں میں 81 رن کی شاندار اننگ کھیلی۔ انہوں نے 14 ویں اوور تک بلے بازی کرتے ہوئے ٹیم کی جیت کی مضبوط بنیاد رکھی اور ’پلیر آف دی میچ‘ بھی بنے۔ اس اننگ کے ساتھ کوہلی اب 7 اننگز میں 328 رن بنا کر اورینج کیپ کی فہرست میں پہلے نمبر پر پہنچ گئے ہیں۔ انہوں نے سن رائزرز حیدرآباد کے ابھیشیک شرما (323 رن) کو پیچھے چھوڑ دیا۔
تیسرے مقام پر سن رائزرز حیدرآباد کے ہینرک کلاسن (320 رن) ہیں، جبکہ گجرات ٹائٹنز کے شبھمن گل 297 رن کے ساتھ چوتھے مقام پر پہنچ گئے ہیں۔ گل نے اس میچ میں 24 گیندوں پر 32 رن بنائے، جس سے وہ چنئی سپر کنگز کے سنجو سیمسن کو پیچھے چھوڑتے ہوئے اوپر آگئے ہیں۔
آر سی بی کے کپتان رجت پاٹیدار بھی اس مقابلے کے بعد فہرست میں آگے بڑھے ہیں۔ حالانکہ انہوں نے اس میچ میں صرف 8 رن بنائے، لیکن کل 238 رن کے ساتھ وہ ایشان کشن کے برابر پہنچ گئے ہیں۔ اسٹرائیک ریٹ کی بنیاد پر پاٹیدار آٹھویں اور کشن نویں نمبر پر ہیں۔ وہیں گجرات کے بی سائی سدرشن نے 58 گیندوں میں سنچری بنا کر سیزن کی پانچویں سنچری بنائی اور ٹاپ-10 میں جگہ بنا لی۔
پرپل کیپ کی دوڑ میں اس میچ کا زیادہ اثر نہیں پڑا، کیونکہ مقابلے میں کل آٹھ وکٹیں ہی گریں۔ گجرات کے پرسدھ کرشنا 12 وکٹوں کے ساتھ تیسرے مقام پر برقرار ہیں اور سن رائزرز حیدرآباد کے ایشان ملنگا کے ساتھ مشترکہ طور پر اس مقام پر ہیں۔ ٹاپ پر چنئی سپر کنگز کے انشل کمبوج اور لکھنو سپر جائنٹس کے پرنس یادو قابض ہیں۔
اسی دوران بھونیشور کمار نے جوس بٹلر کی وکٹ لے کر اپنی وکٹوں کی تعداد 11 تک پہنچا دی ہے۔ وہ اب راجستھان رائلز کے جوفرا آرچر اور روی بشنوئی کے ساتھ مشترکہ طور پر اگلے مقام پر ہیں۔
ہندوستھان سماچار
---------------
ہندوستان سماچار / انظر حسن
