کشن گنج، 25 اپریل (ہ س)۔ضلع کے جیرن گاچھ علاقے میں حال ہی میں تعمیر کی گئی سڑک کے معیار کو لے کرگاؤں والے سخت ناراض ہیں۔ تارا باڑی چوک سے مہیش پورتک جانے والی یہ سڑک قریب پانچ گاؤں کوجوڑتی ہے اورچار پنچایتوں کے درمیان آمدورفت کا اہم راستہ ہے ۔ لیکن تعمیر کے کچھ ہی دنوں بعد اس کی حالت خراب ہوگئی ۔ گاؤں والوں کے مطابق سڑک کو بنے ہوئے صرف ایک ہفتہ ہی ہوا ہے، اس کے باوجود مختلف جگہوں پر گٹیاں اکھڑنا شروع ہو گئی ہے۔سڑک کی حالت اس قدرخراب ہے کہ سڑک کے بیچوں بیچ گھاس اُگ آئی ہے جس سے تعمیراتی کام کے معیار پر سنگین سوالات اٹھ رہے ہیں۔ سڑک کی ناہموار سطح نے راستے کو خطرناک بنا دیا ہے۔ مقامی لوگوں کا الزام ہے کہ تعمیراتی معیارات کو نظر انداز کیا گیا اور ناقص میٹریل استعمال کیا گیا۔گاؤں والوں کا یہ بھی کہنا ہے کہ زیادہ ترتعمیراتی کام رات کے وقت کیا گیا تھا جس سے معیار کے بارے میں مزید شکوک و شبہات پیدا ہوتے ہیں۔ اس سلسلے میں گاؤں والوں نے بتایا کہ انہوں نے متعلقہ جونیئر انجینئر (جے ای) کو اس معاملے کے بارے میں زبانی طورپرآگاہ کیا تھا، لیکن ابھی تک کوئی ٹھوس کارروائی نہیں کی گئی ہے۔ اس سے عوام میں انتظامیہ کے خلاف ناراضگی بڑھ رہی ہے۔گاؤں والوں نے سڑک کی تعمیر کی اعلیٰ سطحی جانچ، قصوروار ٹھیکیداروں کے خلاف سخت کارروائی اور عوام کو راحت فراہم کرنے کے لیے سڑک کی جلد مرمت کا مطالبہ کیا ہے۔ دیکھنا یہ ہے کہ انتظامیہ اس سنگین معاملے پر کتنی فوری ردعمل ظاہر کرتی ہے اور کیا سڑک کی حالت بہتر ہوتی ہے۔ہندوستھان سماچار

ہندوستان سماچار / Mohammad Afzal Hassan