ممبئی ، 22 اپریل (ہ س)۔ بامبے ہائی کورٹ نے بدھ کے روز ناسک ضلع کے مالیگاؤں میں 8 ستمبر 2006 کو ہونے والے سلسلہ وار بم دھماکوں کے مقدمے میں چار ملزمین کو بری کر دیا۔ عدالت نے اپنے فیصلے میں کہا کہ ان کے خلاف پیش کیے گئے شواہد ناکافی ہیں، لہٰذا خصوصی این آئی اے عدالت کے حکم کو بھی منسوخ کیا جاتا ہے۔وکیل کوشک مہاترے کے مطابق ان چار ملزمین—راجندر چودھری، دھن سنگھ، منوہر رام سنگھ نرواریا اور لوکیش شرما—کے خلاف ستمبر 2025 میں خصوصی این آئی اے عدالت نے الزامات طے کیے تھے، جسے ہائی کورٹ میں چیلنج کیا گیا تھا۔ اس درخواست پر چیف جسٹس چندرشیکھر اور جسٹس شیام چاندک کی ڈویژن بنچ کے روبرو بدھ کو سماعت ہوئی، جہاں تفصیلی دلائل سننے کے بعد عدالت نے شواہد کو ناکافی قرار دیتے ہوئے چاروں کو بری کر دیا۔یہ دھماکے مالیگاؤں شہر میں 8 ستمبر 2006 کو ہوئے تھے، جہاں چار بم دھماکوں میں سے تین حمیدیہ مسجد اور بڑا قبرستان کے اندر جبکہ چوتھا مشاورت چوک میں ہوا تھا۔ اس کیس کی ابتدائی تفتیش اے ٹی ایس نے کی تھی اور نو افراد کو گرفتار کیا گیا تھا۔بعد ازاں اس معاملے کی تحقیقات نیشنل انویسٹیگیشن ایجنسی (این آئی اے) کے سپرد کی گئیں، جس نے مذکورہ چار ملزمین—راجندر چودھری، دھن سنگھ، منوہر رام سنگھ نرواریا اور لوکیش شرما—کو گرفتار کیا اور ان کے خلاف چارج شیٹ داخل کی۔اس سے قبل خصوصی این آئی اے عدالت اے ٹی ایس کے ذریعے گرفتار کیے گئے نو ملزمان کو بری کر چکی تھی۔ بعد میں این آئی اے کی جانب سے پیش کردہ چارج شیٹ پر سماعت کے بعد ان چار ملزمان کے خلاف الزامات طے کیے گئے تھے، تاہم اب ہائی کورٹ نے انہیں بھی بے گناہ قرار دے کر بری کر دیا ہے۔ہندوستھان سماچار
--------------------
ہندوستان سماچار / جاوید این اے
