جے پور، 21 اپریل (ہ س)۔ راجستھان میں گرمی کی لہر شدت اختیار کر گئی ہے۔ پیر کو ریاست کے 12 شہروں میں زیادہ سے زیادہ درجہ حرارت 40 ڈگری سیلسیس یا اس سے زیادہ ریکارڈ کیا گیا۔ کوٹا میں سب سے زیادہ درجہ حرارت 42 ڈگری سیلسیس تک پہنچ گیا۔ کوٹا نے باڑمیر اور جیسلمیر جیسے صحرائی اضلاع کو بھی پیچھے چھوڑ دیا۔
محکمہ موسمیات کے مطابق، آئندہ چند روز تک ریاست میں موسم صاف رہے گا اور ہیٹ ویو کا امکان ہے۔ اس کے پیش نظر ایلو الرٹ جاری کیا گیا ہے۔ پھلودی اور باڑمیر میں دن کے ساتھ رات میں بھی گرمی پڑ رہی ہے۔ پھلودی میں کم سے کم درجہ حرارت 28.4 ڈگری سیلسیس درج کیا گیا، جب کہ باڑمیر میں کم از کم درجہ حرارت 27.5 ڈگری سیلسیس اور جیسلمیر میں 26 ڈگری سیلسیس ریکارڈ کیا گیا۔ گرم ہواو¿ں کے باعث لوگوں کو رات کو بھی راحت نہیں مل رہی۔
دارالحکومت جے پور میں بھی صورتحال تشویشناک ہے۔ یہاں زیادہ سے زیادہ درجہ حرارت 40 ڈگری سیلسیس اور کم سے کم 27 ڈگری سیلسیس رہا جو کہ معمول سے تقریباً تین ڈگری سیلسیس زیادہ ہے۔ گرمی دن -رات لوگوں کو پریشان کر رہی ہے۔ کوٹا میں، بڑھتی ہوئی گرمی اور گرمی کی لہر کے خطرے سے نمٹنے کے لیے اسپتالوں میں خصوصی تیاری کی گئی ہے۔ میڈیکل کالج انتظامیہ نے 200 بستروں پر مشتمل پری -فیبریکیٹڈ وارڈ ریزرو کیا ہے جس میں سے 50 کو ہیٹ ویو کے مریضوں کے لیے شروع بھی کر دیا گیا ہے۔
جودھپور میں درجہ حرارت مسلسل 40 ڈگری سیلسیس سے اوپر ہے۔ پیر کو زیادہ سے زیادہ درجہ حرارت 40.7 ڈگری سیلسیس رہا۔ دوپہر کے وقت سڑکیں سنسان رہیں، لوگوں کو گھروں کے اندر رہنے پر مجبور ہونا پڑا۔ شدید گرمی سیاحت کو بھی واضح طور پر متاثر کر رہی ہے۔ اجمیر اور ادے پور میں سیاحوں کی تعداد میں کمی آئی ہے۔ اجمیر میں، انا ساگر کے پشتے اور دیگر سیاحتی مقامات ویران دکھائی دیے، جب کہ ادے پور میں لوگ دوپہر کے وقت سایہ ڈھونڈتے نظر آئے۔
الور میں درجہ حرارت 41.6 ڈگری سیلسیس تک پہنچ گیا۔ محکمہ موسمیات نے اگلے چار روز تک ہیٹ ویو کی وارننگ دیتے ہوئے لوگوں کو ہوشیار رہنے کا مشورہ دیا ہے۔ سیکر میں ہلکے ہوا کے جھونکوں سے پارہ میں ہلکی سی گراوٹ آئی لیکن چلچلاتی دھوپ سے کوئی راحت نہ ملی۔ ماہرین نے مشورہ دیا ہے کہ رات 12 سے 4 بجے کے درمیان باہر جانے سے گریز کریں، وافر مقدار میں پانی پئیں، اپنا سر ڈھانپ کر رکھیں اور اگر آپ کو گرمی کی لہر کی علامات کا سامنا ہو تو فوری طبی امداد حاصل کریں۔
راجستھان میں فی الحال گرمی سے راحت کی کوئی امید نہیں ہے اور آنے والے دنوں میں صورتحال مزید سنگین ہوسکتی ہے۔
ہندوستھان سماچار
ہندوستان سماچار / محمد شہزاد
