سپول، 19 اپریل (ہ س)۔ ضلع کے ندی تھانہ علاقہ کےواقع کدمہا پنچایت کے وارڈ نمبر 7 میں ایک 10 سالہ لڑکا مشتبہ حالات میں لاپتہ ہوگیا ہے۔ لواحقین کو شبہ ہے کہ اس کی موت ٹریکٹر کی ٹکر سے ہوئی اور لاش کو ثبوت چھپانے کے لیے ٹھکانے لگا دیا گیا۔

موصولہ اطلاع کے مطابق کٹایا گاؤں کے رہنے والے رنویر پنڈت کا بیٹا رام کرشنا پنڈت ہفتہ کے روز اسکول سے واپس آنے کے بعد اپنے گھر کے قریب آم کے باغ میں دوسرے بچوں کے ساتھ کھیل رہا تھا۔ اسی وقت کئی ٹریکٹر باغ سے گزرتے ہوئے وارڈ نمبر 6 کے رہائشی محمد ہادی کے گھر مٹی لے جا رہے تھے۔

لواحقین کا الزام ہے کہ حادثہ کے دوران بچہ ٹریکٹر سے ٹکرا گیا۔ حادثے کے بعد ٹریکٹر ڈرائیور گھبرا گیا اور بچے کواسپتال لے جانے کے بجائے لاش کو چھپا دیا۔ دیگر ٹریکٹر ڈرائیور بھی موقع سے فرار ہو گئے۔ جب دیرشام تک بچہ گھر واپس نہ آیا تو اہل خانہ نے اس کی تلاش شروع کردی۔

دریں اثنا گاؤں والوں نے آم کے باغ میں کئی جگہوں پر خون کے دھبے دیکھے، جس سے ان کے شکوک و شبہات مزید بڑھ گئے۔ اطلاع ملتے ہی نادی تھانہ کی پولیس جائے وقوعہ پر پہنچی، جائے وقوعہ کو نشان زد کیا اور رکاوٹیں کھڑی کر دیں۔

معاملے کی تحقیقات کے لیے فرانزک ٹیم کو بھی بلایا گیا ہے۔ واقعہ کی اطلاع ملتے ہی علاقے میں کشیدگی پھیل گئی۔ مشتعل گاؤں والوں نے لاش کی بازیابی کا مطالبہ کرتے ہوئے پولیس کے خلاف احتجاج کیا اور جائے وقوعہ پر موجود پولیس ٹیم کو تقریباً دو گھنٹے تک گھیرلیا ۔

صورتحال کی سنگینی کو سمجھتے ہوئے ایس ڈی پی او راجو رنجن کمار جائے وقوعہ پر پہنچے اور بھیڑ کو پرسکون کیا۔ ندی تھانہ انچارج شیشوپال روی داس نے بتایا کہ دو ٹریکٹر ڈرائیوروں کو حراست میں لیا گیا ہے اور ان سے پوچھ گچھ کی جارہی ہے۔ ڈاگ اسکواڈ کی مدد سے لاپتہ لڑکے کی تلاش جاری ہے۔ پولیس کا کہنا ہے کہ جلد ہی سارا معاملہ حل کر لیا جائے گا۔

ہندوستھان سماچار

ہندوستان سماچار / Mohammad Afzal Hassan