جلگاؤں ، 18 اپریل (ہ س)۔ اجین میں مہاکال کے درشن کے بعد خوشی خوشی اپنے گھر واپس لوٹنے والے ورنگاؤں (تحصیل بھساول) کے ٹھاکور خاندان پر وقت نے قیامت ڈھا دی، جب بورگاؤں بزرگ پولیس چوکی حدود کے نیشنل ہائی وے پر پیش آئے ایک بھیانک سڑک حادثے میں ایک ہی خاندان کے تین افراد کی موت ہو گئی، جس میں ماں، بیٹا اور محض پانچ سالہ نواسی شامل ہیں، جس سے پورے علاقے میں غم و افسوس کی فضا پھیل گئی ہے۔
ورنگاؤں فیکٹری کے رہائشی شیام وکرم ٹھاکور (45) اپنے خاندان کے ساتھ اَرٹیگا کار میں اوجین درشن کے لیے گئے تھے اور رات دیر گئے واپس آتے وقت خود گاڑی چلا رہے تھے، اسی دوران علی الصبح بورگاؤں بزرگ کے قریب انہیں گاڑی چلاتے ہوئے اونگھ آ گئی، جس کے باعث کار بے قابو ہو کر سڑک کنارے بجلی کے کھمبے سے تیز رفتار میں جا ٹکرائی، ٹکر اتنی شدید تھی کہ گاڑی کا اگلا حصہ مکمل طور پر تباہ ہو گیا۔
اس المناک حادثے میں شیام وکرم ٹھاکور (عمر 45)، شوبھا وکرم ٹھاکور (عمر 60) اور شیونیا شیام ٹھاکور (عمر 5، ساکن ورنگاؤں فیکٹری، تحصیل بھساول) کی موت ہو گئی، جبکہ ان کی بیوی، دو بیٹیاں اور دیگر رشتہ داروں سمیت کل چھ افراد شدید زخمی ہو گئے ہیں۔
حادثے کی سب سے دلخراش بات پانچ سالہ معصوم شیونیا کی موت رہی، جو حادثے میں زخمی ہونے کے باوجود ضلع اسپتال میں زیر علاج کے دوران سب سے مسکرا کر بات کر رہی تھی اور اس نے گھر والوں سے پینے کے لیے فروٹی مانگی تھی، تاہم مزید علاج کے لیے اسے برہانپور لے جاتے وقت راستے میں ہی اس کی جان چلی گئی۔
ہندوستھان سماچار
--------------------
ہندوستان سماچار / جاوید این اے
