جموں, 16 اپریل (ہ س): مرکزی حکومت نے سید حامد بخاری کو جموں و کشمیر اور لداخ کے لیے رجسٹرار آف کمپنیز مقرر کیا ہے۔ سید حامد بخاری کا تعلق انڈین کارپوریٹ لا سروس سے ہے اور وہ سال 2016 میں یو پی ایس سی سول سروسز امتحان کے ذریعے منتخب ہوئے تھے۔

سرکاری ذرائع کے مطابق بخاری انتظامی امور میں کئی سالہ تجربہ رکھتے ہیں اور گزشتہ آٹھ برسوں کے دوران انہوں نے حکومت ہند کے ساتھ سرینگر اور نئی دہلی میں مختلف ذمہ داریاں انجام دی ہیں۔

سید حامد بخاری کا تعلق جموں و کشمیر سے ہے اور ان کا تعلیمی پس منظر مینجمنٹ اور قانون سے وابستہ ہے۔ انہوں نے اسلامک یونیورسٹی آف سائنس اینڈ ٹیکنالوجی اونتی پورہ سے تعلیم حاصل کی، بعد ازاں نیشنل لا اسکول آف انڈیا یونیورسٹی بنگلورو سے بزنس اینڈ الائیڈ لاز میں پوسٹ گریجویشن کیا، جبکہ جے این یو سے سیاست اور بین الاقوامی تعلقات کی تعلیم بھی حاصل کی۔

ان کی تقرری کو ایک اہم انتظامی پیش رفت قرار دیا جا رہا ہے۔

ہندوستھان سماچار

---------------

ہندوستان سماچار / محمد اصغر