کولکاتا، 16 اپریل (ہ س)۔ بھوانی پور اور نندی گرام اسمبلی حلقوں سے انتخاب لڑنے والے بی جے پی امیدوار شوبھیندو ادھیکاری نے اردو زبان کے تعلق سے کولکاتا کے میئر فرہاد حکیم کے مبینہ ریمارکس پر شدید ردعمل کا اظہار کیا ہے۔

جمعرات کو بھبانی پور اور نندی گرام اسمبلی حلقوں میں انتخابی مہم چلاتے ہوئے، بی جے پی امیدوار شوبھیندو ادھیکاری نے کہا کہ ترنمول کانگریس جس طریقے سے بنگال میں عرب ثقافت اور اردو زبان کو فروغ دے رہی ہے اس سے بنگالی اور ہندوستانی ثقافت کو خطرہ ہے۔ تاہم انہوں نے یہ بھی واضح کیا کہ انہیں اردو زبان پر کوئی اعتراض نہیں ہے۔

انہوں نے کہا کہ فرہاد حکیم نے حال ہی میں مبینہ طور پر ایک بیان دیا ہے جس سے یہ ظاہر ہوتا ہے کہ اگر مغربی بنگال میں 50 فیصد لوگ اردو میں بات کریں تو وہ خوش ہوں گے - ادھیکاری نے زور دے کر کہا، یہ ناقابل قبول ہے۔

قابل ذکر ہے کہ حالیہ دنوں ایک ویڈیو منظر عام پر آیا ہے جس میں فرہاد حکیم کو اس سلسلے میں تبصرہ کرتے ہوئے سنا جا سکتا ہے۔ اس مخصوص بیان کے خلاف شوبھیندو ادھیکاری نے اپنا سخت اعتراض درج کرایا ہے۔

---------------

ہندوستان سماچار / عبدالواحد