جموں, 16 اپریل (ہ س): شمالی ریلوے کے جموں ڈویژن نے اعلان کیا ہے کہ 17 اپریل سے نئی دہلی کے آدرش نگر اور وسطی کشمیر کے بڈگام کے درمیان مشترکہ پارسل پروڈکٹ-ریپڈ کارگو سروس ٹرین چلائی جائے گی، جس سے وادی کے تاجروں، خصوصاً پھل کے کاشتکاروں اور دستکاروں کو بڑی سہولت ملے گی۔

سرکاری بیان کے مطابق یہ سروس ابتدائی طور پر 31 مئی تک آزمائشی بنیادوں پر باقاعدگی سے چلائی جائے گی، جس کے بعد طلب کے مطابق اسے مستقل کیا جا سکتا ہے۔

ٹرین نمبر 00462 بڈگام سے صبح 6:15 بجے روانہ ہو کر اگلے روز صبح 5 بجے آدرش نگر نئی دہلی پہنچے گی۔ راستے میں بڑی برہمنہ اور امبالہ کینٹ اسٹیشنوں پر رک کر مال کی لوڈنگ اور اَن لوڈنگ کی سہولت فراہم کی جائے گی۔

واپسی پر ٹرین نمبر 00461 آدرش نگر سے صبح 5 بجے روانہ ہو کر اگلے دن صبح 10:45 بجے بڈگام پہنچے گی۔

ریلوے حکام کے مطابق یہ خصوصی پارسل ٹرین آٹھ پارسل ویگنز اور ایک سیٹنگ کم لگیج کوچ پر مشتمل ہوگی اور سڑک کے مقابلے میں تیز رفتار سروس فراہم کرے گی، جو تقریباً 23 سے 24 گھنٹوں میں سفر مکمل کرے گی۔

بیان میں کہا گیا ہے کہ اس سروس کے ذریعے سیب، چیری، زعفران، اخروٹ، پشمینہ شال اور دیگر مقامی مصنوعات کو ملک بھر کی منڈیوں تک جلد اور محفوظ طریقے سے پہنچایا جا سکے گا، جس سے جموں و کشمیر کی معیشت کو فروغ ملے گا۔

سینئر ڈویژنل کمرشل منیجر اوچت سنگھل نے کہا کہ تاجروں اور کسانوں کی مانگ پر یہ سروس شروع کی جا رہی ہے، جس کا مقصد انہیں تیز، محفوظ اور کم لاگت والا ذریعہ نقل و حمل فراہم کرنا ہے۔

ہندوستھان سماچار

---------------

ہندوستان سماچار / محمد اصغر