حیدرآباد، 16 اپریل (ہ س)۔

آندھرا پردیش کے کرنول ضلع میں جمعرات کی صبح ایک سڑک حادثہ میں آٹھ افراد ہلاک اور کم از کم 12 دیگر زخمی ہوگئے۔ حادثہ نیشنل ہائی وے 167 پر پیش آیا، کرناٹک-آندھرا پردیش سرحد کے قریب، کرنول ضلع کے دھرم پور ٹول پلازہ سے تقریباً 8-9 کلومیٹر دور۔

پولیس کے مطابق یاتری ایک چھوٹے پک اپ ٹرک میں مشہور منترالیم میں واقع سری راگھویندر سوامی مٹھ کی زیارت کے لیے جا رہے تھے۔ کرناٹک-آندھرا پردیش سرحد پر منترالیم کے چیلاکالادونہ کے قریب پک اپ ٹرک اور ایک ریڈی مکس لاری کے درمیان تصادم میں کم از کم آٹھ یاتری ہلاک اور 12 دیگر زخمی ہو گئے، حادثہ کے وقت پک اپ ٹرک میں کل 21 افراد سوار تھے۔

ان میں سے پانچ کی موقع پر ہی موت ہوگئی، جب کہ تین اسپتال میں زخموں کی تاب نہ لاتے ہوئے چل بسے۔ زخمیوں کو یمیگنور کے ایک اسپتال میں داخل کرایا گیا ہے۔ مرنے والوں کی شناخت کمار (60)، دیپیکا وینا (35)، سنیل (40)، بیلی (3)، میناکشی (60)، پٹما (60)، تیما (60) اور لولیکشی کے طور پر ہوئی ہے۔

یمیگنور سب ڈویژنل ڈی ایس پی بھارگوی نے بتایا کہ زخمیوں میں سے سات کو بعد میں بہتر علاج کے لیے کرنول منتقل کیا گیا، جب کہ دیگر چار کا علاقے کے اسپتال میں علاج چل رہا ہے۔ ایک شخص کی حالت مستحکم بتائی جاتی ہے۔ انہوں نے کہا کہ مزید تفصیلات تحقیقات کے بعد سامنے آئیں گی۔

آندھرا پردیش کے وزیر اعلیٰ این چندرا بابو نائیڈو نے حادثے پر گہرے رنج و غم کا اظہار کیا۔ انہوں نے حکام سے واقعہ کے بارے میں دریافت کیا اور کہا کہ یہ انتہائی افسوسناک ہے کہ دو گاڑیوں کے درمیان تصادم میں آٹھ افراد کی جانیں گئیں۔

وزیر ٹرانسپورٹ منڈی پلی رام پرساد ریڈی نے بھی خوفناک سڑک حادثہ پر گہرے دکھ کا اظہار کیا۔ انہوں نے مرنے والوں کے اہل خانہ سے تعزیت کا اظہار کیا اور کہا کہ یہ انتہائی افسوسناک ہے کہ زائرین مذہبی زیارت پر تھے جب یہ حادثہ پیش آیا۔

ہندوستھان سماچار

ہندوستان سماچار / عطاءاللہ