رسوئی گیس کی قیمتوں میں اضافہ، گھریلو سلنڈر 60 روپے مہنگا، قیمت میں اضافے کے خلاف کانگریس کا احتجاج

بھوپال، 07 مارچ (ہ س) - گھریلو رسوئی گیس کی قیمتوں میں اضافہ ہوا ہے۔ گھریلو ایل پی جی سلنڈر کی قیمت میں 60 روپے اور 19 کلو والے کمرشل سلنڈر میں 115 روپے کا اضافہ کیا گیا ہے۔ گیس سلنڈر کی قیمت بڑھنے کے خلاف بھوپال میں کانگریس سڑکوں پر اتر آئی۔ بھوپال ضلع کانگریس نے ہفتہ کو روشن پورہ چوراہے پر احتجاج کرتے ہوئے مرکزی حکومت کے خلاف نعرے بازی کی۔ مظاہرین نے ’مہنگائی کا انجکشن‘ لکھے ہوئے پوسٹرز اور گیس سلنڈر کے کٹ آوٹ لے کر احتجاج ریکارڈ کرایا۔

احتجاج میں بڑی تعداد میں خواتین کارکنان بھی شامل ہوئیں۔ انہوں نے کہا کہ گھر کا بجٹ کچن سے شروع ہوتا ہے اور گیس سلنڈر کی مسلسل بڑھتی ہوئی قیمتوں نے خاندانوں کی معاشی حالت پر براہ راست اثر ڈالا ہے۔ انہوں نے حکومت سے فوری طور پر قیمتیں کم کرنے کا مطالبہ کیا۔ بھوپال ضلع کانگریس صدر پروین سکسینہ نے کہا کہ سال 2014 میں گھریلو گیس سلنڈر کی قیمت تقریباً 400 روپے تھی، جو اب بڑھ کر 900 روپے سے زیادہ ہو گئی ہے۔ ان کا الزام ہے کہ مہنگائی ہر شعبے میں بڑھ رہی ہے اور اس کا سب سے زیادہ اثر عام لوگوں پر پڑ رہا ہے۔ انہوں نے وارننگ دی کہ اگر گیس سلنڈر کے دام کم نہیں کیے گئے تو کانگریس آنے والے وقت میں بڑی تحریک چلائے گی۔

مدھیہ پردیش کانگریس کے صدر جیتو پٹواری نے بھی اس معاملے پر مرکزی حکومت کو تنقید کا نشانہ بنایا۔ انہوں نے کہا کہ حکومت ایک طرف سستا ایندھن فراہم کرنے کی بات کرتی ہے، وہیں دوسری طرف گیس سلنڈر کے دام مسلسل بڑھائے جا رہے ہیں۔ واضح رہے کہ اس سے قبل 8 اپریل 2025 کو بھی گھریلو گیس سلنڈر کی قیمتوں میں اضافہ کیا گیا تھا۔ تاہم، 8 مارچ 2024 کو عالمی یومِ خواتین کے موقع پر حکومت نے سلنڈر کی قیمت میں 100 روپے کی کٹوتی کی تھی۔

مدھیہ پردیش کے اہم شہروں میں گھریلو ایل پی جی سلنڈر کے دام اس طرح ہیں:

* بھوپال: 918 روپے

* اندور: 941 روپے

* گوالیار: 996 روپے

* جبل پور: 919 روپے

* اجین: 972 روپے

ہندوستھان سماچار

---------------

ہندوستان سماچار / انظر حسن