پونے ، 30 مارچ (ہ س)۔ناسک میں مبینہ فریبی بابا اشوک کھرات سے متعلق معاملے میں نئے انکشافات سامنے آ رہے ہیں، جس کے باعث سیاسی حلقوں میں ہلچل پیدا ہو گئی ہے۔ اس پس منظر میں سماجی کارکن ترپتی دیسائی نے دعویٰ کیا ہے کہ اس معاملے میں 39 اراکین اسمبلی کے ساتھ قانون ساز کونسل کی نائب چیئرپرسن نیلم گورے بھی کھرات سے ملنے جاتی تھیں۔انہوں نے ایک پریس کانفرنس میں کہا کہ نیلم گورے نے ناسک کے ایک ہوٹل میں اشوک کھرات سے ملاقات کی تھی۔ ان کے مطابق گورے مبینہ طور پر اپنی رکنیت اور وزارت سے متعلق مستقبل جاننے کے لیے کھرات سے رجوع کرتی تھیں اور متعدد بار اس کے دفتر بھی گئی تھیں۔ترپتی دیسائی نے مزید الزام عائد کیا کہ ناسک کے کالج روڈ پر واقع اسی دفتر میں بعض خواتین کے ساتھ زیادتی کے واقعات بھی پیش آئے تھے اور اسی مقام پر نیلم گورے کی آمد ہوئی تھی۔ ان دعوؤں کے سامنے آنے کے بعد معاملہ مزید حساس ہو گیا ہے۔اس سے قبل شیو سینا (شندے گروپ) کے سابق وزیر دیپک کیسرکر نے بھی کہا تھا کہ اس معاملے میں 39 اراکین اسمبلی کھرات سے مل چکے ہیں، تو صرف ان کا نام ہی کیوں نشانہ بنایا جا رہا ہے۔ان الزامات کے بعد اس معاملے کو نیا رخ ملنے کا امکان ظاہر کیا جا رہا ہے، تاہم متعلقہ افراد کی جانب سے تاحال کوئی سرکاری ردعمل سامنے نہیں آیا ہے، جبکہ تفتیش کو مزید تیز کرنے کا مطالبہ بھی زور پکڑ رہا ہے۔ہندوستھان سماچار

ہندوستان سماچار / جاوید این اے