مدھے پورہ، 29 مارچ (ہ س)۔ بہار کے مدھے پورہ ضلع کے گوالپارا بلاک میں ارار گھاٹ پل کے نیچے سورسرندی میں ڈوبی کار کے چوتھے نوجوان کی لاش اتوار کی صبح برآمد ہوئی ہے۔ گزشتہ دو دنوں سے لاپتہ نوجوانوں کی تلاش جاری تھی۔ اتوار کی صبح گاؤں والوں نے تقریباً ایک کلومیٹر دور ندی کے کنارے پر پانی میں لاش کو تیرتی ہوئی دیکھی اور انہوں نے اسے باہر نکالا۔

متوفی کی شناخت ساگر کمار (25) ساکن جے پال پٹی وارڈ نمبر 15 ضلع مدھے پورہ کے طور پر کی گئی ہے۔ اطلاعات کے مطابق یہ لاش ارار پل سے تقریباً ایک کلومیٹر کے فاصلے پر چھپریہ واسا وارڈ 11 کے پیچھے سورسرندی میں ایک موڑ کے قریب سے ملی تھی۔ مقامی لوگوں نے صبح 9 بجے کے قریب کشتی کے ذریعے لاش کو ندی سے نکالا اور اسے ساحل پر رکھ دیا۔ اس کے بعد پولیس کو اطلاع دی گئی، جس نے لاش کو اپنی تحویل میں لے کر پوسٹ مارٹم کے لیے مدھے پورہ صدر اسپتال بھیج دیا۔

بتایا جاتا ہے کہ ہفتہ کے روز ایس ڈی آر ایف کی ٹیم نے ساگر کمار کے لیے دن بھر تلاشی مہم چلائی، لیکن ناکام رہی۔ اس سے قبل ہفتے کے روز کار میں موجود تین دیگر نوجوانوں کی لاشیں برآمد ہوئی تھیں۔

ان میں بھیرکھی وارڈ-23 کے رہنے والے گھنشیام کمار، سہرسہ ضلع کے بسنہی تھانہ علاقے کے مکامہ کے رہنے والے انکت کمار اور سور بازار تھانہ علاقے کے پرساہی کے رہنے والے بسنت کمار شامل ہیں۔

واقعہ جمعہ کی رات اس وقت پیش آیا جب چاروں نوجوان گوالپاڑا میں میلے سے واپس آرہے تھے۔ ارارگھاٹ پل کے قریب تیز رفتار کار بے قابو ہو کر ٹیلی فون کے دو پرانے کھمبوں سے ٹکرا گئی اور 30 فٹ سورسر ندی میں جاگری۔ حادثہ اتنا شدید تھا کہ کار مکمل طور پر تباہ ہو گئی۔ کار کی کھڑکیوں کے شیشے ٹوٹ گئے، جس سے دو نوجوان ندی میں بہہ گئے، جب کہ کار سے دو افراد کی لاشیں نکال لی گئیں۔ مقامی لوگوں کی اطلاع پر پولیس اور امدادی ٹیمیں جائے وقوعہ پر پہنچ گئیں۔ ہفتہ کے روز تین لاشوں کا پوسٹ مارٹم کیا گیا جبکہ چوتھے نوجوان کا پوسٹ مارٹم اتوار کے روز کیا گیا۔

ہندوستھان سماچار

ہندوستان سماچار / Mohammad Afzal Hassan