نئی دہلی، 29 مارچ (ہ س)۔

دہلی پولیس کی کرائم برانچ (ایسٹرن رینج -1) نے چوری شدہ موبائل فونز کے ایک بین ریاستی گروہ کا پردہ فاش کیا ہے، دو ملزمین کو گرفتار کیا ہے۔ پولیس نے ان کے قبضے سے 83 مہنگے موبائل فون برآمد کیے جن کی مالیت لاکھوں روپے بتائی جاتی ہے۔ ملزمین ان فونز کو مغربی بنگال کے راستے بنگلہ دیش بھیجنے کا منصوبہ بنا رہے تھے۔

کرائم برانچ کے ڈپٹی کمشنر آف پولیس پنکج کمار نے اتوار کو بتایا کہ 27 مارچ کو انسپکٹر آشیش شرما کو جمنا وہار کے علاقے میں ایک گینگ چلانے کے بارے میں خاص اطلاع ملی تھی۔ اس کے بعد ٹیم نے منصوبہ بند چھاپہ مارا اور کرائے کے مکان کی تیسری منزل سے دونوں ملزمین کو رنگے ہاتھوں پکڑ لیا۔ جائے وقوعہ سے کارٹن میں پیک چوری کے 83 موبائل فون برآمد ہوئے ہیں۔

گرفتار ملزمین کی شناخت غازی آباد کے ساکن سیویج (34) اور بھلسا ڈیری کے رہنے والے فردین (25) کے طور پر کی گئی ہے۔ دوران تفتیش ملزمین نے انکشاف کیا کہ انہوں نے دانش نامی شخص سے چوری شدہ موبائل فون خریدے اور بذریعہ کورئیر بنگلہ دیش بھجوائے۔ ڈپٹی کمشنر آف پولیس کے مطابق برآمد کیے گئے موبائل فونز میں آئی فون، سام سنگ، ون پلس، ویوو، اوپو اور ریئلمی جیسے برانڈز شامل ہیں۔ پولیس نے بتایا کہ کئی موبائل فونز کے آئی ایم ای آئی نمبر دہلی اور اتر پردیش میں درج چوری کے کیسوں سے مماثل ہیں۔ پولیس نے دونوں ملزمان کو عدالت میں پیش کرکے جوڈیشل ریمانڈ پر جیل بھیج دیا۔ دریں اثنا، پولیس ٹیمیں گینگ کے دیگر ارکان اور ان کے نیٹ ورک کی تلاش کے لیے چھاپے مار رہی ہیں۔

ہندوستھان سماچار

ہندوستان سماچار / عطاءاللہ