نئی دہلی، 26 مارچ (ہ س)۔ جامعہ ملیہ اسلامیہ، نئی دہلی میں ہندوستان-عرب ثقافتی مرکز کی جانب سے ”روایت کی بازگشت اور تبدیلی کی آوازیں: عرب اسلامی ثقافت کے مستقبل کی نقشہ سازی“ کے موضوع پر ایک روزہ قومی کانفرنس کا انعقاد کیا گیا جس میں 25 سے زائد اسکالرز، ماہرین تعلیم اور محققین نے عربی ثقافت کے بارے میں بحث کی۔

جامعہ ملیہ اسلامیہ کے رجسٹرار پروفیسر مہتاب عالم رضوی نے افتتاحی اجلاس میں بطور مہمان خصوصی شرکت کی۔ جے این یو کے سنٹر فار عربی اینڈ افریقن اسٹڈیز کے سابق چیئرپرسن پروفیسر مجیب الرحمن نے کلیدی خطبہ دیا جبکہ ڈاکٹر وائل عواد، سینئر عرب صحافی اور نئی دہلی میں جمہوریہ عراق کے سفیرجناب عدی حاتم محمد نے اس موقع پر بالترتیب مہمان مقرر اور مہمان اعزازی کی حیثیت سے شرکت کی۔ پروفیسر ہمایوں اختر نظمی، ڈائریکٹر، سینٹر فار ویسٹ ایشین اسٹڈیز نے افتتاحی اجلاس کی صدارت کی۔

افتتاحی سیشن کا آغاز تلاوت کلام پاک سے ہوا، اس کے بعد خطبہ استقبالیہ اور کانفرنس کے موضوع کا تعارف سنٹر کے ڈائریکٹر ڈاکٹر محمد آفتاب احمد نے پیش کیا۔ انہوں نے مہمانوں اور کانفرنس کے موضوع کا سامعین سے تعارف کرایا اور جامعہ کے وائس چانسلر پروفیسر مظہر آصف اور رجسٹرار پروفیسر مہتاب عالم رضوی کا شکریہ ادا کیا کہ انہوں نے اس کانفرنس کے انعقاد کی نہ صرف اجازت دی بلکہ مالی تعاون بھی کیا۔ انہوں نے وہاں موجود تمام ماہرین تعلیم، اسکالرز، طلباءاور شرکاءکا بھی خیرمقدم کیا۔

کلیدی مقرر پروفیسر مجیب الرحمن نے اس بات پر روشنی ڈالی کہ عرب اسلامی ثقافت تاریخی طور پر متحرک، جامع اور علوم پر مبنی رہی ہے اور عصری چیلنجوں سے نمٹنے کے لیے کلاسیکی روایات کی دوبارہ تشریح کی اہمیت پر زور دیا۔ انہوں نے عالمگیریت، جدیدیت اور بدلتے ہوئے سماجی و سیاسی حقائق کی روشنی میں عرب اسلامی ثقافتی روایات پر نظر ثانی کرنے کی ضرورت پر مزید زور دیا۔ مہمان مقرر، ڈاکٹر عواد نے اس دور میں عرب اسلامی ثقافت پر اس طرح کے علمی مکالموں کے انعقاد کی اہمیت پر زور دیا۔

اجلاس کے مہمان خصوصی پروفیسر رضوی نے ہندوستان اور عرب دنیا کے درمیان جغرافیائی سیاسی تعلقات پر روشنی ڈالتے ہوئے اپنے خیالات کا اظہار کیا جو کہ جغرافیہ، ثقافت، اقتصادیات اور مشترکہ عالمی خدشات کی بنیاد پر تاریخی طور پر ابھرتی ہوئی شراکت کی نمائندگی کرتا ہے۔ بحر ہند کے قدیم تجارتی نیٹ ورکس سے لے کر عصری سفارتی مصروفیات تک، یہ رشتہ ایک کثیر جہتی تعاون کے فریم ورک میں پروان چڑھا ہے۔

پروفیسر ایچ اے نظمی نے اپنے صدارتی کلمات میں کہا کہ ہندوستان اور عرب دنیا ایک متحرک اور ابھرتی ہوئی شراکت داری کا اشتراک کرتے ہیں جس کی جڑیں تاریخی رشتوں سے جڑی ہیں اور اس کی تشکیل عصری اسٹریٹجک ضروریات کے مطابق ہے ڈاکٹر ذوالفقار علی انصاری ( کانفرنس کے کوآرڈینیٹر اور انڈیا عرب کلچرل سنٹر جامعہ ملیہ اسلامیہ کے ایسوسی ایٹ پروفیسر) نے رسمی طور پر شکریہ کے کلمات پیش کیے۔

ہندوستھان سماچار

ہندوستان سماچار / محمد شہزاد