تل ابیب/تہران، 26 مارچ (ہ س)۔ مغربی ایشیا میں جاری کشیدگی کے درمیان اسرائیل نے دعویٰ کیا ہے کہ اس نے ایران کے خلاف اپنی فوجی کارروائیاں تیز کر دی ہیں۔ اسرائیلی وزیر اعظم بنجمن نیتن یاہو نے کہا کہ ان کی فوج ایرانی فوجی اڈوں پر مسلسل حملے کر رہی ہے اور ایک حالیہ بڑی کارروائی میں آئی آر جی سی کا ایک نیول کمانڈر مارا گیا۔

نیتن یاہو کے مطابق یہ کمانڈر متعدد حملوں میں ملوث تھا اور آبنائے ہرمز کی ناکہ بندی کرنے کی حکمت عملی کو آگے بڑھا رہا تھا۔ انہوں نے زور دے کر کہا کہ اسرائیل ایران کے دہشت گردانہ ڈھانچے کے خلاف پوری طاقت کے ساتھ کارروائی کر رہا ہے اور اس مہم میں امریکہ کے ساتھ قریبی رابطہ قائم ہے۔

دریں اثنا، ایک بیان میں، اسرائیلی فوج نے بندر عباس میں ایک حملے کے دوران آئی آر جی سی نیوی کے ا سپیشل آپریشن یونٹ کے سربراہ بہنام رضائی کی ہلاکت کی تصدیق کی۔ مزید برآں اسی آپریشن میں نیول کمانڈر علیرضا تنگسیری کی ہلاکت کے دعوے بھی کیے گئے ہیں۔

فوج کے مطابق یہ آپریشن خاص طور پر ایران کی بحری فوجی صلاحیتوں اور قیادت کو نشانہ بنانے کے لیے کیا گیا تھا۔ اسرائیل کا موقف ہے کہ ان حملوں کا مقصد خطے میں ایران کی اسٹریٹجک سرگرمیوں کو نقصان پہنچانا ہے۔

تاہم ایران کی جانب سے ان دعوو¿ں کی آزادانہ طور پر تصدیق نہیں کی گئی ہے۔ خطے میں بڑھتے ہوئے حملوں اور جوابی کارروائیوں کے درمیان، صورت حال مسلسل کشیدہ ہے، جس سے وسیع تر تصادم کا خدشہ بڑھتا جا رہا ہے۔

---------------

ہندوستان سماچار / عبدالسلام صدیقی