ڈھاکہ، 26 مارچ (ہ س)۔ بنگلہ دیش کے راجباڑی ضلع میں ایک بس کو کشتی پر لادے جانے کے دوران پیش آنے والے حادثے میں مرنے والوں کی تعداد بڑھ کر 26 ہو گئی ہے۔ بدھ کی دیر شام، راجباری ضلع کے دولتدیا فیری ٹرمینل پر مسافروں سے بھری بس دریائے پدما میں گر گئی۔ امدادی کاروائی کے بعد رات گئے بس کو دریا سے نکال لیا گیا۔ واقعے کے بعد ضلعی انتظامیہ نے پانچ رکنی اعلیٰ سطحی انکوائری کمیٹی تشکیل دے دی ہے جسے تین دن میں رپورٹ پیش کرنے کی ہدایت کی گئی ہے۔ اس کے علاوہ مہلوکین کے لواحقین کو ابتدائی معاوضہ کے طور پر 25 ہزار ٹکا دینے کا بھی اعلان کیا گیا ہے۔

بنگلہ دیش کے سرکردہ اخبارات - ڈھاکا ٹریبیون اورپرتھم الو کے مطابق بدھ کی شام ایک بڑا حادثہ بنگلہ دیش کے راجباری ضلع کے گوالنڈا اپازی میں واقع دولتدیا فیری ٹرمینل پر اس وقت پیش آیا جب مسافروں سے بھری بس دریائے پدما میں جاگری۔ اس حادثے میں اب تک 26 افراد کی موت کی تصدیق ہو چکی ہے۔ یہ حادثہ شام 5 بجکر 15 منٹ پر اس وقت پیش آیا جب 'سوہردہ پریباہن' کی بس کو فیری پر لوڈ کرنے کی کوشش کی جا رہی تھی۔ اس عمل کے دوران، بس پونٹون-3 پر اپنا توازن کھو بیٹھی اور دریا میں جا گری۔ بتایا جاتا ہے کہ بس میں تقریباً 40 سے 45 مسافر سوار تھے۔

حادثے کے فوراً بعد ریسکیو آپریشن شروع کیا گیا جس میں پولیس، آرمی، نیول پولیس اور فائر سروس کی ٹیمیں شامل تھیں۔ ریسکیو جہاز 'حمزہ' کی مدد سے بس کو تقریباً چھ گھنٹے بعد رات 11:30 بجے دریا سے نکالا گیا۔ حکام کے مطابق بس سے کل 26 لاشیں نکالی گئی ہیں جن میں مرد، خواتین اور بچے شامل ہیں۔ تمام لاشیں ان کے اہل خانہ کے حوالے کر دی گئی ہیں۔ حادثے سے صرف دو افراد کو زندہ بچایا جا سکا۔

ابتدائی معلومات کے مطابق بس کشتیا کے کمارکھلی سے ڈھاکہ جا رہی تھی اور فیری میں سوار ہونے کا انتظار کر رہی تھی۔ اسی دوران ’حسنہ ہینا‘ نامی ایک چھوٹی یوٹیلیٹی فیری پونٹون سے ٹکرا گئی، جس سے بس اپنا توازن کھو کر دریا میں جاگری۔

اس واقعہ کے بعد راج باڑی ضلع انتظامیہ نے اسی رات دیر گئے فوری طور پر پانچ رکنی اعلیٰ سطحی انکوائری کمیٹی تشکیل دی۔ ایڈیشنل ڈسٹرکٹ مجسٹریٹ محمد حفیظ الرحمن کو اس کمیٹی کا کنوینر مقرر کیا گیا ہے۔ دیگر ممبران میں ایڈیشنل سپرنٹنڈنٹ آف پولیس (کرائم اینڈ آپریشنز)، بی آئی ڈبلیو ٹی سی کے دولتدیہ آفس کے اسسٹنٹ جنرل منیجر، راجباری فائر سروس اور سول ڈیفنس کے ڈپٹی ڈائریکٹر، اور گوپال گنج کے اپاضل نرباہی آفیسر شامل ہیں۔

کمیٹی کو ہدایت کی گئی ہے کہ وہ تین دن میں اپنی رپورٹ ڈپٹی کمشنر کو پیش کرے۔ مزید برآں، ضلعی انتظامیہ نے مرنے والوں کے لواحقین میں سے ہر ایک کے لیے 25000 ٹکا کے ابتدائی معاوضے کا اعلان کیا ہے۔

ہندوستھان سماچار

---------------

ہندوستان سماچار / عبدالواحد