نئی دہلی، 24 مارچ (ہ س)۔ مرکزی حکومت نے مغربی ایشیا میں جاری کشیدگی پر بات چیت کے لیے بدھ کو شام 5:00 بجے ایک کل جماعتی میٹنگ بلائی ہے۔ یہ اجلاس پارلیمنٹ ہاؤس انیکسی میں ہوگا۔ پارلیمنٹ میں تمام سیاسی جماعتوں کے قائدین کو شرکت کی دعوت دی گئی ہے۔ اجلاس میں مغربی ایشیا میں بڑھتی ہوئی کشیدگی کے بھارت پر ممکنہ اثرات پر توجہ مرکوز کی جائے گی۔ اسکے علاوہ حکومت گھریلو گیس (ایل پی جی) کی سپلائی اور مارکیٹ کے غیر مستحکم حالات کے حوالے سے حزب اختلاف کے ساتھ تبادلہ خیال

کرے گی۔ تاہم، اس بات کا امکان کم سمجھا جا رہا ہے کہ راہل گاندھی، جو کہ ایک ممتاز اپوزیشن لیڈر اور حکومت کے سخت ناقد ہیں، میٹنگ میں شرکت کریں گے۔ میڈیا سے بات کرتے ہوئے راہل گاندھی نے خود کہا کہ وہ پہلے سے طے شدہ پروگرام کے تحت کیرالہ جا رہے ہیں۔

قابل ذکر ہے کہ حزب اختلاف کے رہنماؤں نے اس سے قبل اس معاملے پر حکومت کے موقف پر تنقید کی تھی اور مطالبہ کیا تھا کہ جلد از جلد ایک کل جماعتی اجلاس بلایا جائے۔ منگل کو قائد حزب اختلاف راہل گاندھی اور کانگریس لیڈر جے رام رمیش نے مغربی ایشیا میں تنازعہ سے نمٹنے کے لیے حکومت کو نشانہ بنایا۔ راجیہ سبھا میں، جان برٹاس نے 2003 کی پارلیمانی قرارداد کا حوالہ دیا- جس میں عراق جنگ کی مذمت کی گئی تھی- اور حکومت سے اپیل کی کہ وہ ایران سے متعلق صورتحال کے بارے میں ایسا ہی موقف اختیار کرے۔

اس دوران منگل کو راجیہ سبھا میں خطاب کرتے ہوئے، وزیر اعظم نریندر مودی نے ہندوستان کی توانائی کی سلامتی کے مسائل اور مغربی ایشیا میں تنازعہ کے وسیع مضمرات پر بات کی۔ انہوں نے تمام ریاستوں پر زور دیا کہ وہ مرکزی حکومت کے ساتھ قریبی تال میل میں کام کریں۔ انہوں نے اس بات پر زور دیا کہ ایسے مشکل وقت میں یہ ضروری ہے کہ پارلیمنٹ کا ایوان بالا امن اور بات چیت کا مشترکہ پیغام پیش کرے۔ اس سے پہلے، پیر کو، لوک سبھا میں تقریر کرتے ہوئے، وزیر اعظم نے مغربی ایشیا میں بحران سے نمٹنے کے لیے حکومت کی طرف سے اٹھائے جانے والے اقدامات کا خاکہ پیش کیا تھا۔

ہندوستھان سماچار

---------------

ہندوستان سماچار / عبدالواحد